En prenent lo nom de l’abat Oliba, personatge istoric màger en la gestacion de la cultura catalana, un grop d’artistas e d’intellectuals de Catalonha Nòrd a creat un nòu collectiu que visa de “far conéisser Catalonha al public e als mèdias francofòns”. Lo Collectiu Oliba, que nasquèt ièr divendres amb lo sosten de l’actor Sergi López, a ja mandat un primièr messatge, “Observatz Catalonha, aquò es passionant”, ont s’explica perqué un milion e mièg de catalans manifestèron l’Onze de Setembre per demandar l’independéncia.
 
Al delà d’explicar e de far comprene la realitat catalana al mond francofòn, lo Collectiu Oliba tanben vòl seguir la dralha del Collectiu Emma e amassar, comentar e emendar, se cal, los articles publicats dins la premsa francofòna sus l’actual procès catalan.
 
Demest los signataris d’aquela nòva plataforma nòrd-catalana, i a, al delà de Sergi López, l’escrivan Joan-Lluís Lluís, lo professor Alà Baylac-Ferrer, l’escrivan Joan-Daniel Bezsonoff, lo musician Raph Dumas, l’editritz Maria Àngels Falqués, lo musician Gerard Jacquet, l’istoriana de l’art Josefina Matamoros, l’avocat e èx-eurodeputat Miquel Mayol, la professora Renada-Laura Portet, lo director executiu de l’Institut de Recèrca e Innovacion del Centre Pompidou de París, Vincent Puig Mailhol, lo jornalista Aleix Renyé, lo director del Teatre de l’Arxipèlag Domènec Reixach, l’escrivana Eliane Thibault-Comelade e lo director del Conservatòri de Perpinhan Daniel Tosi.