Lo deputat breton Paul Molac a contestat la ministra francesa dels afars europèus, Nathalie Loiseau, après qu’ela faguèt tornar a l’òrdre los 41 senators qu’avián rendut public un manifèst qu'apelava al “respècte de las libertats e dels dreches fondamentals en Catalonha”.
 
Loiseau diguèt que cap de parlamentari se deviá pas “immiscir” car “aquò es un subjècte que depend de la responsabilitat d’Espanha”, mas Molac li recòrda Montesquiu e la separacion dels poders: “En çò que concernís a la separacion de poders, los parlamentaris an pas de demandar a l’executiu francés se pòdon enjónher l’estat espanhòl de respectar los dreches de l’òme”.
 

Madame @NathalieLoiseau en ce qui concerne la séparation des pouvoirs,  les parlementaires n'ont pas à demander à l'exécutif français  s'ils peuvent enjoindre l'état espagnol de respecter les droits de l'Homme.#Montesquieu#catalogne@RetPS@ANC_FRANCEhttps://t.co/uMMIDpGMIO

— Paul Molac (@Paul_Molac) 26 de març de 2019

 
E mai aja fach partida del partit de Macron, Molac es un deputat bretonista que coneis plan l’afar de Catalonha e a mostrat son sosten als presonièrs politics.
 
Tanben en 2015 sostenguèt Dàvid Grosclaude e mandèt un corrièr a Manuel Valls, alavetz primièr ministre de França, per li atraire l’atencion sus la cauma de la fam que la fasiá l’elegit occitanista fàcia al mesprètz de l’estat francés envèrs las politicas per la lenga occitana.
 
 
François Calvet denóncia de pressions
 
Lo senator nòrd-catalan, François Calvet, qu’es un dels signataris del manifèst, assegura que los 41 senators an patit de pressions diplomaticas de las fòrtas per retirar lo document, mas que se tenon fièrs. Segon Calvet, quitament Manuel Valls a telefonat a cadun dels signataris del manifèst en lor dire qu’aquò es “un escàndol” que qu’o pòscan pas far.
 
 
Lo manifèst dels senators apèla al “respècte de las libertats e dels dreches fondamentals en Catalonha”
 
De remembrar que la dimenjada passada, 41 senators franceses rendèron public un manifèst qu’apèla al “respècte de las libertats e dels dreches fondamentals en Catalonha”. Lo tèxt es signat per de senators del partit de Macron, de socialistas, de comunistas, de republicans, d’ecologistas, de Generacion·s e del Partit Radical, e denóncia la repression que patisson los representants politics legitims, encarcerats o en exili, e demanda l’intervencion de l’estat francés dins lo procès politic independentista. L’iniciativa es promoguda pels senators François Calvet, Michel Canevet, Ronan Dantec, André Gattolin, Pierre Ouzoulias e Simon Sutour.
 
Los signataris meton endavant que, coma europèus e coma franceses, se senton inquiets pels grèus eveniments que se produson en Catalonha a causa del jutjament a la Cort Suprèma espanhòla contra d’èx-membres de la Generalitat de Catalonha, l’èx-presidenta del Parlament de Catalonha e de quadres de las associacions catalanas.
 
Los senators denóncian que la situacion es un vertadièr atac contra los dreches e las libertats democraticas. Planhon que la gravetat d’aquel afar siá mesestimada dins l’estat francés. Per aquela rason fan una peticion per que França e los Païses de l’Union Europèa intervengan per restablir las condicions del dialòg e trobar de solucions politicas a un problèma politic.