Lo santuari marselhés de Nòstra Dòna de la Gàrdia, conegut popularament coma la “Bòna Maire”, poiriá èsser menat, pèira per pèira, a Nòva York. Los administrators del Rockefeller Center an anonciat l’intencion de crompar lo sit e de l’installar a l’airal dich The Cloisters, una seccion del Metropolitan Museum of Art situada dins un pargue installat sus un puèg de Manhattan, que conten qualques bastissas medievalas dont la majoritat son sortidas d’Occitània: una partida de las clastras de Sant Guilhèm del Desèrt, una partida de l’abadiá de Bonafont de Comenge o las clastras del convent de Tria de Baïsa.
 
E mai se The Cloisters se definís coma un sit consagrat a l’arquitectura e als jardins medievals, la còla del Metropolitan a mostrat un enòrme interès a emportar lo santuari marselhés d’estil “romanicobizantin”. “L’edifici es representatiu de l’istoricisme arquitectural del sègle XIX”, çò ditz Mara Rodrigues, pòrtavotz del Metropolitan, que remarca “l’alternància de pèira blanca e de marbre verd de Florença”, “lo monument de la verge en metal daurat” e sustot los mosaïcs de l’interior, pensadas per l’obrador Mora de Nimes e faches per la Società Musiva Veneziana.
 
Se lo Rockefeller, la comuna de Marselha e l’evescat arriban a un acòrdi, un musèu ocupariá la plaça de Nòstra Dòna de la Gàrdia.
 
 
 



 

fffff		fffff
	Aquesta nòva es un peis d’abril.