Raportàvem diluns passat l’agression que l’aviá patida Geneviève Legay, una niçarda de 73 ans, militanta d’Attac, seriosament nafrada al cap per la polícia mentre que manifestava sus la Plaça Garibaldi de Niça. Divendres passat, après la publicacion de nòus imatges vidèo, lo procuraire admetèt qu’un policièr èra lo responsable de la casuda de Legay. Ara lo policièr mes en causa exprimís sos “sincèrs pentiments” mas se defend en disent d’aver agit “dins l’estricte respècte dels òrdres”. Geneviève Legay es totjorn a l’espital.

Un policièr es mes en causa per la seriosa plaga al cap que la patiguèt l’activista niçarda, Geneviève Legay, dins la 19a dimenjada de manifestacions dels Gilets Jaunes. Divendres passat, lo procuraire de la republica a Niça admetiá qu’un agent aviá apartat Legay en la fasent tombar, après  l’analisi d’imatges publicats pels mèdias e las camèras de susvelhança. Una informacion judiciària es dobèrta per violéncia volontària. Geneviève Legay patís plusors fracturas al crani e d’ematòmas sosdurals e es totjorn espitalizada.
 
Lo policièr mes en causa a manifestat sos “sincèrs pentiments” mas assegura qu’agiguèt “dins l’estricte respècte dels òrdres donats per sa ierarquia” en ajustant qu’”utilizèt pas d’arma”, segon un comunicat que son avocat a transmés a l’AFP, çò rapòrta Nice-Matin.
 
 
“Cau anar fins en aut de la ierarquia”
 
Dissabte, un cortègi de Gilets Jaunes, de militants d’esquèrra e d’altermondialistas se gandiguèron a l’espital en signe de sosten a Legay.
 
Aquí, una de las filhas de la victima diguèt net e clar que caliá pas encargar de tota la pèca lo policièr en question mas la ierarquia qu’a organizat aquela repression. “Atencion, es pas question qu’aqueu policier prenga tot sus li sieus espatlas, i a de donaires d’òrdres, cau anar fins en aut de la ierarquia per veire quau donèt l’òrdre de cargar”, çò diguèt.