Lo mes d’abril es un mes plan complicat e decisiu. En Superliga, la dimenjada de Pascas multiplica las partidas. En Elèit 1, la Dimenjada Magica fixa las idèas sus la seguida del campionat e las qualificacions.

I a quicòm que truca al país catalan
 
Èran partits fisançoses, los Dragons, per desfisar lo campion Wigan en coa de classament en aquesta debuta de sason. Los Sang e Aur tenguèron còp un mièg temps: menats 8-0. Lo segond temps virèt a la cachavièlha e a una pietadosa operacion “Pòrtas dobèrtas” per una desfaita bèla: 42-0. E dissabte, es lo cap de fila Saint Helens qu’arriba a Perpinhan!
 
Seriá damatge que los catalans sortiguèsson tròp lèu de la corsa a la qualificacion (5 plaças) e se trigossèsson dins una sason sens motivacion per eles e pel public afogat.
 
Dragons e Wigan se tornaràn trapar lo 18 de mai a Barcelona: que l’idèa balhe un vam novèl als catalans!
 
 
La Copa demòra sus la logica
 
Aquesta dimenjada, se debanavan los quarts de finala de la Copa Lòrd-Derby.
 
Dissabte, a Albi, los Canaris ofriguèron un festenal ofensiu que faguèt virar canturla als jogaires locals; victòria de Carcassona: 45-20.
 
Dimenge, èra fèsta a Vilagalhenc amb la recepcion de Lesinhan. Los jogaires d’Elèit 2 de Cabardés tenguèron còp fins a un quart d’ora de la fin abans de daissar la victòria als vesitaires: 28-20. I a pas un grand valat entre lo naut de l’Elèit 2 e lo nivèl superior.
 
Victòrias mai aisidas pels Dragonets a Carpentràs (50-14) e Limós a Palau (40-14).
 
Dimenge, mesa a jorn del campionat (Avinhon-Limós, Vilanòva-Tolosa) abans la Dimenjada Magica dels 13 e 14 d’abril a Carcassona.
 
 
NRL: Tempèsta e Lapinons en cap de fila
 
Aprèp tres jornadas de campionat NRL, doas formacions an pas encara conegut la desfaita: la Tempèsta de Melbourne (victòria a Penrith:32-2) e los Lapinons (victòria 28-20 fàcia als Titans).
 
 
 
 
Alan Roch
 
 
 
 



 
 
 
Imatge: