Las eleccions municipalas en Turquia an tornat als partits curdistas las comunas de las principalas vilas del Curdistan del Nòrd, que lors elegits foguèron arrestats e encarcerats jos l’acusacion de collaborar amb lo PKK mentre que lo quite president turc, Recep Tayyip Erdoğan, nomenava sos successors. En mai d’aquò, lo partit d’Erdoğan a perdut los conselhs municipals d’Ankara e d’Istambol.
 
Los resultats oficials an donat al candidat de l’opausant Partit Republican del Pòble (CHP) la comuna d’Ankara, la capitala del país, amb aperaquí lo 51% dels vòtes,
malgrat los avertiments Erdoğan, que menacèt pendent la campanha electorala que i auriá “de consequéncias” pels ciutadans de la capitala s’elegissián pas son candidat. A Istambol, la vila pus poblada de l’estat, tanben s’es impausat lo candidat del CHP amb lo 49% dels vòtes.
 
Totun, a l’escala de tot l’estat turc lo partit mai votat es estat Justícia e Desvolopament (AKP), del president Erdoğan, amb lo 51,63% dels vòtes, fàcia al 37,55% obtengut pel CHP, segon de donadas que correspondon al 99,82% del comptatge de las voses.
 
 
L’HDP recupèra lo Curdistan del Nòrd
 
Cal tanben soslinhar que lo Partit Democratic dels Pòbles (HDP), pròcurd e en favor de las minoritats, es totjorn estat la formacion mai votada dins lo sud-èst de l’estat turc, ont a gaireben atench lo 63% dels vòtes. Atal l’HDP a recuperat los conselhs municipals de las principalas vilas del Curdistan del Nòrd coma Amed (Diyarbakır), Mardin, Batman, Van, Siirt e Hakkari. Aquí lo curdisme aviá ja ganhat las eleccions en 2014 mas maites elegits foguèron destituits e encarcerats, acusats de collaborar amb lo PKK.
 
Entre d’autras mesuras, los candidats de l’HDP se son engatjats a anullar las decisions contra los dreches collectius del pòble curd e de las femnas dins las comunas recuperadas. Pasmens, Erdoğan a menaçat que l’estat poiriá tornarmai destituir los elegits e impausar de governors.
 
Per contra, la comuna de Sirnak a viscut un estonant cambiament de tendéncia amb la victòria de l’AKP. Aquí, lo deputat de l’HDP Hüseyin Kaçmaz a denonciat que l’estat turc a mes de milièrs de militars sus la lista electorala per los far votar.
 
 

#HDP#Diyarbakır Büyükşehir Belediyesi, Eş Başkan Adayları Hülya Alökmen Uyanık ve Adnan Selçuk Mızraklı, KA.DER’in Kadın Dostu Kentler Taahhütnamesini imzaladılar. Belediye hizmetlerini ve yapılan harcamaları “Cinsiyete Duyarlı Veri” temelli ölçmeyi taahhüt ettiler. pic.twitter.com/KxLJc1kqWR

— KA.DER (@KA_DER_) 29 de març de 2019