Lo conselh regional de Piemont, region de l’estat italian ont se tròban las Valadas occitanas, a aprovat una resolucion qu’exigís la libertat dels presonièrs politics catalans, lo retorn a una “situacion de normalitat democratica” e la dobertura d’un dialòg politic, que segon eles es “lo sol biais d’arribar a una resolucion coerenta amb las valors de la democracia”. Lo tèxt, qu’an aviat de deputats del Partit Democratic, membre del Partit Socialista Europèu, demanda urgentament al president del conselh e al ministre dels afars estrangièrs de far “tot çò possible per atirar l’atencion internacionala sus l’inquietanta situacion en Catalonha”.
 
La mocion engatja l’assemblada regionala a sollicitar del Naut Representant de l’Union Europèa d’establir “totes los esfòrces necessaris per garentir la resolucion de la question catalana” e a far virar lo tèxt aprovat dins las autras assembladas de las regions e de las províncias autonòmas d’Itàlia.
 
Los elegits citan lo manifèst dels intellectuals e politicians italians que demandavan la libertat dels presonièrs politics, e explican que nòu dels inculpats son acusats del delicte de rebellion e mai per aquela acusacion aguèsse calgut de violéncia. “Totun, la sola violéncia trobada fins ara, compte tengut dels innombrables imatges qu’an virat dins lo Mond, es exercida per la polícia espanhòla contra de votants e de manifestants, quitament pas independentistas, qu’ensajan de resistir pacificament, amb los braces levats, en defensa dels burèus de vòte. Quitament lancèron de balas de goma suls ciutadans, malgrat que lor usatge foguèsse exprèssament enebit en Catalonha”.