A compdar d’aué e enquiath 9 de deseme, se debanarà en Bossòst (Val d’Aran) era 5au edicion dera “anditada”. Pendent era setmana, es restaurants e bars d’aguesta vila aranesa qu’aufriràn plats damb er andito coma protagonista.

Entà començar er eveniment, aué tàs 12h que s’aufrissen anditos gratuïtaments ena plaça dera Hònt. Pendent era degustacion populara era còlha des Sautarèths de Bossòst que haràn ua exibicion de dances tradicionaus deth país. Enguan, coma nauetat, que s’auce ua hèira d’artesans e que s’organizen talhèrs entara mainadèra damb productes artesanaus.
 
Er andito qu’ei era saucissa tradicionau de Bossòst que se hège en iuèrn en totes es cases, dempús d’aucir eth pòrc. Actuauments que s’elabòren enes carnisseries en tot seguir estrictaments era tradicion. Que se hè damb es caps des pòrcs, hereishures, arnelhs, alh e pan. Sonque se comercialize en iuèrn pr’amor que damb era calor e vien agres.
 
Era “anditada” qu’ei organizada pera Associacion de Comerçants e Entrepreneires de Bossòst (ACEB) e compde damb eth sosten deth Conselh Generau d’Aran, la Caixa, Ràdio Val Pirineos e Aran Nau.
 
 
 
 
FM