L’èx-ministre e ancian candidat a la presidéncia de França, Benoît Hamon, vesitèt los presonièrs Oriol Junqueras, Raül Romeva e Jordi Cuixart dins la preson de Soto del Real, près de Madrid. Hamon considèra que, de son ponch de vista de ciutadan europèu, lor encarceracion demòstra que la democracia espanhòla “es pas en bona santat”, e lo politician francés compara aquesta amb las de païses coma França, Ongria e Polonha, ont crei qu’es tanben en marrida santat. Dins aquel sens diguèt que respectava la Constitucion espanhòla mas que jutjava necessària una solucion “democratica que passa pas pels tribunals”.
 
Hamon faguèt sa vesita acompanhat pel ministre catalan dels afars exteriors, Alfred Bosch, e pel numèro 2 d’ÈRC a las europèas, Diana Riba, qu’es la companha de Raül Romeva. Hamon quitèt lo Partit Socialista francés en 2017 e es ara candidat a las europèas per la formacion Generacion·s.
 
Es per aquela rason qu’Hamon aviá demandat a Alfred Bosch, fa qualques setmanas a  París, de conéisser Junqueras e Romeva, e tanben s’apondèt a la reünion lo president d’Òmnium Cultural, Jordi Cuixart. Diana Riba i poguèt pas participar perque a pas l’estatut d’una autoritat e perque, coma pròcha de Romeva, a un autre regim de vesitas.
 
A la sortida de la preson, Hamon defendèt que vesitava los tres presonièrs per una question tan simpla coma “las libertats fondamentalas en Euròpa”. “Lor repròchan d’aver organizat un referendum, lor repròchan pas d’aver organizat una manifestacion violenta, o d’aver volgut obténer l’independéncia a quin prètz que siá, mas d’aver organizat un vòte”, çò manifestèt.
 
Hamon reconeguèt qu’el es pas independentista e que sa vesita la cal pas comprene coma un sosten a l’independéncia mas en tèrmes de “santat democratica”. “Coma ciutadan europèu, me demandi se la democracia es en bona santat en Euròpa, en França la responsa es non, e tanpauc en Ongria o en Polonha; e en Espanha cresi que la responsa es tanben non”, a afirmat. Dins aquel sens, crei que i a “quicòm que truca dins la democracia europèa”.
 
Per aquela rason, Hamon considèra qu’es pas el que portarà una solucion al conflicte en Catalonha, mas crei totun qu’en cap de cas aquò deu pas passar pels tribunals. “La solucion es, forçadament, democratica e per la via del dialòg”, çò soslinhèt.
 
 
 

Comme citoyen européen, je me pose la question suivante : « la démocratie est-elle en bonne santé en Europe ? » La réponse est souvent non. La solution à ce qui se passe en Catalogne doit être démocratique et politique, et non judiciaire. #VivelEuropeLibrepic.twitter.com/z570poIzBN

— Benoît Hamon (@benoithamon) 1 d’abril de 2019