Los 5 e 6 d’abriu passats que’s debanè lo setzau Passa-Pòrts a Montrejau, a l’iniciativa de l’Ostau Comengés. L’edicion 2019 qu’estó ua escaduda, dab ua bèra frequentacion, maugrat ua metèo drin capriciosa. A l’entorn de 300 personas que s’i amassèn lo dissabte ser.
 
Que començè lo divés dab ua jornada dedicada aus mainatges, qui s’i hasón hòrt tot dia a har teatre, dança, canta e iniciacion a las quilhas. Qu’assistín en fin de vrespada a un concèrt especiau d’Alidé Sans. Encantats, la màger part qu’acabèn lo concèrt sus l’empont dab la cantadora.
 
Lo divés ser que’s tienè tanben ua taula redonda perpausada dens l’encastre deu projècte europèu Viva Tramontana. Que s’i parlè de la transmission deu patrimòni culturau immateriau de las montanhas europèas, dab ua reflexion sus quate tipes d’expressions: parlar, dançar, tribalhar e esperar. Los intervienents que vienèvan de Gasconha, d’Itàlia e de Polonha. L’escadença d’abordar tematicas importantas mes a còps desbrombadas, com las valors deu tribalh en lo pastoralisme o enqüèra lo culte marial.
 
Lo dissabte qu’estó hestiu tanben, dab estagis de canta, de dança, de musica e de fabricacion de halhòts. Ua bèra restitucion qu’estó perpausada abans lo sopar, aprestat peus productors deu terrador. Enfin, l’eveniment que’s clavè dab 4 grops sus l’empont: La Sonsoni, Alidé Sans e Paulin Courtial, lo duo Cance-Courtial e enfin Eths Chòts e Companhia.
 
Au finau, lo hestau Passa-ports que gahè lo son prètzhèit, qui ei tanben l’eslogan de l’Ostau Comengés : “guardar la memòria, transméter e animar lo territòri”. Qu’ac an tot hèit en dus dias.
 
Ràdio País qu’èra sus plaça, ua emission especiau qu’i serà consacrada, dab entervistas de mei d’un actor de l’eveniment.
 
 
 
 
Ràdio País
 
 
 
 

---

Aqueste article es possible gràcias a un acòrdi de cooperacion entre Jornalet e Ràdio País.