Lo govèrn friolan s’es engatjat a far realitat un projècte que s’ocupariá de 35 lengas d’Euròpa pas plenament reconegudas. L’executiu de Friol considèra que son territòri, que compta amb tres lengas minorizadas —friolan, alemand e eslovèn—, pòt desvolopar un ròtle remarcable quant a la promocion de la diversitat lingüistica.

Lo fach qu’en Friol convergiscan tres grandas culturas de l’Euròpa centrala —la latina, l’eslava e la germanica—, aquò dinamiza divèrses projèctes qu’ensajan de potenciar lo ròtle singular que Friol poiriá aver vèrs lo bastiment d’una Euròpa unida dins la diversitat. Paradoxalament, las tres grandas culturas son representadas en Friol per de lengas minorizadas: tant lo friolan, coma l’eslovèn e l’alemand an pas d’oficialitat plena, que l’a solament l’italian, una lenga non autoctòna del país. Un d’aqueles projèctes que comença de se menar a tèrme es la creacion d’una agéncia, de dimension europèa, per las lengas minorizadas.
 
Lo govèrn autonòm, per mejan del sieu conselhièr de la Cultura, Elio d’Anna, a anonciat que s’es engatjat a realizar lo projècte. S’agís d’una autocandidatura politica de Friol que poiriá prene còrs mercés als finançaments europèus, es a dire als fonzes estructurals 2014-2020 assignats al govèrn de Friol-Venècia Júlia. Segon los calculs dels promotors, l’agéncia s’ocupariá de 35 lengas minorizadas d’Euròpa. A l’encòp, los quites promotors an decidit de demandar a la vesina Eslovènia de crear una autra agéncia consagrada a las 23 lengas d’Estat oficialas de l’Union Europèa. Serián doas agéncias complementàrias que vendrián un ponch de referéncia cultural, significatiu e atractiu, per la lor ubicacion, dins l’ensems d’Euròpa.
 
Mentre que lo consens sul projècte avança, lo govèrn de Friol-Venècia Júlia cèrca los mejans per formar un ret d’alianças que siá solide e largament participatiu. Après l’estapa dels estudis sus la viabilitat de l’autocandidatura, una còla d’especialistas se consagra a precisar lo ròtle estrategic qu’a lo territòri, las potencialitats, las fonts de finançament, l’individualizacion dels possibles collaboradors intèrnes e extèrnes, las estructuras de dimension europèa que lo projècte n’a de besonh per venir realitat.