Lo primièr ministre de Malta, Joseph Muscat, anoncièt dissabte un acòrdi per desembarcar los 64 migrants del vaissèl de salvament Alan Kurdi, ont aquestes an passat mai d’una setmana a la deriva. Seràn menats en Alemanha, França, Portugal e Luxemborg “gràcias a la coordinacion efectiva entre [lor] país e la Comission Europèa. Cap d’eles demorarà pas a Malta, perque [pòdon] pas assumir aquela carga solets”, çò diguèt Muscat sus Twitter.
 
E mai, dins un comunicat, lo govèrn maltés planh l’excessiva responsabilitat que la deu assumir en aqueles cases, qu’excedís segon el largament sa capacitat. “Encara un còp, l’estat membre mai pichon de l’Union Europèa es estat somés a una pression innecessària per resòlver un cas qu’èra pas de sa proprietat ni de sa responsabilitat”.
 
De son latz, la pòrtavotz de la Comission Europèa, Natasha Bertaud, saludèt la collaboracion internacionala per metre fin a aquela crisi. “Me senti reconeissenta per la solucion qu’avèm trobada pels migrants a bòrd de l’Alan Kurdi”.
 
L’Alan Kurdi es un batèl de salvament maritim de l’ONG alemanda Sea Eye. Après aver socorregut 64 migrants del naufragi, ensagèt de los menar a Malta, mas lo tempèri l’obliguèt de virar devèrs Lampedosa. Lo ministre de l’Interior d’Itàlia, Matteo Salvini, refusèt de l’aculhir e lo vaissèl demorèt a la deriva dins las aigas internacionalas.
 
Lo ministre alemand de l’Interior, Horst Seehofer, anoncièt divendres passat que son país èra dispausat a aculhir qualques unes dels 64 migrants, e a l’encòp faguèt una crida a sos collègas europèus per qu’ajudèsson tanben a l’Alan Kurdi.
 

UNHCR was present at the disembarkation in Malta of 62 persons rescued by the @seaeyeorg#AlanKurdi. After spending many days at sea they are relieved that the ordeal is over. pic.twitter.com/r5rEE5FZ2Q

— UNHCR Malta (@UNHCRMalta) 13 d’abril de 2019

 

Dozens of refugees rescued at sea disembark in #Malta#Valletta#AlanKurdipic.twitter.com/I8nor2NAPJ

— Ruptly (@Ruptly) 14 d’abril de 2019