Lo Parlament Europèu aprovèt dimars una nòva nòrma per protegir los raportaires d’activitats illegalas o irregularas dins los contractes publics, los servicis financièrs, lo blanquiment de cabals, la seguretat dels produches e dels transpòrts, la seguretat nucleara, la santat publica, o lo consum e la proteccion de donadas. Per 591 vòts en favor, 29 contra e 33 abstencions, los eurodeputats an decidit d’enebir explicitament las represalhas contra los denonciaires d’informacions coma las de LuxLeaks o los Papièrs de Panamà, qu’expausèron d’irregularitats dins lo pagament dels impòstes de maitas societats multinacionalas e quitament de particulars. A mai, tanben s’introdutz de mecanismes per evitar qu’aquelas personas o lors pròches pòscan èsser “suspenduts, degradats o intimidats”.
 
Ara los estats an dos an per començar d’aplicar aquela nòva lei europèa, que permet que las denóncias se depausen dirèctament davant las institucions o burèus de l’UE, e que protegís lo raportaire. S’après la denóncia, lo raportaire crei que se pren pas de mesuras o qu’el pòt patir de damatges imminents, aurà una proteccion per expausar l’infraccion publicament.
 
“D’escàndols recents coma LuxLeaks, los papièrs de Panamà o Football Leaks an demostrat l’enòrma precarietat que patisson los denonciaires a l’ora d’ara. Abans las eleccions europèas, lo Parlament avertís qu’a escotat los chepics dels ciutadans e a sostengut de nòrmas sevèras per garentir lor seguretat e la de las personas que decidiscan d’alçar la votz contra las infraccions de la legislacion comunautària”, çò diguèt Virginie Rozière, l’eurodeputada esquerrista lengadociana encargada de la legislacion.