Lo projècte de l’Aeropòrt Internacional del Grand Oèst, que vòlon bastir dins la municipalitat bretona de Kernitron-al-Lann (Notre-Dame-des-Landes, Bretanha), es vengut un conflicte politic important pel govèrn francés. La setmana passada, la polícia intrèt dins l’airal qu’ocupariá l’aeropòrt, ont dempuèi qualques meses s’èra creat un campament amb de volontaris per empedir lo començament de las òbras.

Los gendarmas s’afrontèron als acampats e estrosselèron las installacions, en desencadenant una crisi politica qu’a afectat lo Partit Socialista francés (PS) e lo “govèrn d’esquèrra”. De concentracions e de manifestacions contra lo projècte se son debanadas pendent la dimenjada per tot l’Estat francés, e fòrça volontaris son a rebastir las cabanas dins lo bòsc afectat.
 
Divendres, davant la pression mai que mai del movement ecologista, lo primièr ministre francés Jean-Marc Ayrault anoncièt la creacion d’una comission de dialòg entre las autoritats e los que se son acampats dins lo bòsc ont se vòl bastir lo nòu aeropòrt. Ça que la, la comission es estat recebuda amb pauc d’entosiasme pels grops que s’opausan al projècte, pr’amor que considèran que s’agís d’una operacion per lavar l’imatge de l’operacion policièra.
 
Entre los opausants al projècte, i a un grop d’elegits que meton en question lo besonh d’aquel aeropòrt, lo partit Euròpa Ecologia-Los Verds (EELV) —que sosten lo “govèrn d’esquèrra” e  fa partida de la majoritat que govèrna Bretanha—, de grops nacionalistas bretons e una associacion de païsans e d’elevaires afectats pel projècte.
 
Al delà de las manifestacions, i a de grafitis contra l’aeropòrt sus las parets dels sètis del PS per tot l’estat, e de militants ecologistas an ocupat de comunas e de bastissas publicas. Qualques voses del PS an criticat las operacions de la polícia.
 
En Occitània, la memòria de la lucha del Larzac a portat un considerable movement de solidaritat amb los ecologistas bretons (vejatz las nòvas restacadas).
 
L’aeropòrt del Grand Oèst es pensat per remplaçar l’actual aeropòrt de Nantas e configurariá un nos de comunicacions en Bretanha.
 
 
 
_____
- Seguiment de las informacions sul jornal breton 7Seizh
- Dorsièr especial sul jornal Le Telegramme