Actualitats
Escòcia anóncia un segond referendum d’independéncia abans la prima de 2021
Sturgeon a fach l’anóncia pendent una intervencion parlamentària en disent qu’es lo plan de son govèrn per respondre al Brexit
Sturgeon ne faguèt l’anóncia durant una intervencion parlamentària. En mai d’aquò, lo govèrn escocés a publicat un comunicat que prepausa lo dialòg entre partits —”conscient que pas totes son independentistas”— per debatre quinas competéncias cal transferir al parlament escocés per protegir los interèsses economics e socials del país. Sturgeon a apondut qu’aviariá una Assemblada Ciutadana per discutir de la futura Escòcia en cas d’independéncia.
Lo Partit Nacional Escocés (SNP) presentarà al parlament una lei per menar a bon tèrme lo referendum. Lo de 2014 se faguèt après un pache signat dos ans abans entre lo primièr ministre britanic, alavetz David Cameron, e l’escocés, Alex Saldmon.
L’SNP a ja lançat la campanha en favor de l’independéncia, amb un sit web, un compte de Twitter (@YesScot) e un vidèo:
Westminster isn’t working for Scotland. We’ve been ignored too often. It’s time for a fresh start – to choose a different and better path.
— Yes (@YesScot) 24 d’abril de 2019
As an independent country, Scotland’s future will be in Scotland’s hands. Sign here to pledge your support. https://t.co/r3WjSWVjjPpic.twitter.com/OC1XEyUkx9
Plan economic per l’independéncia d’Escòcia
Nicola Sturgeon aviá presentat dins la dimenjada son plan economic per l’independéncia del país, dins un article que lo publicava en exclusivitat The National. Afirmava qu’amb la polemica actuala sul Brexit, fòrça mond que votèron “non” a l’independéncia en 2014 an cambiat de vejaire.
Lo rapòrt se debatrà la dimenjada que ven, dins la conferéncia del Partit Nacional Escocés (SNP), e ten tres aspèctes màgers segon Sturgeon: lo primièr pertòca la poténcia economica d’Escòcia per comparason amb d’autras nacions independentas de dimensions similaras, lo segond met en evidéncia la marrida gestion de Westminster que provòca un deficit fiscal pels escoceses, e lo tresen defend un scenari de negociacion e de relacion entre Escòcia e lo Reialme Unit que contrasta amb lo procès del Brexit.
Lo rapòrt reconeis qu’una Escòcia independenta auriá pas la responsabilitat legala del deute del Reialme Unit, malgrat que siá “corrècte” que ne pague una part “justa”. E mai soslinha que caldriá far una transicion “sonhada, administrada e responsabla” devèrs una moneda independenta e que contunharián d’emplegar la liura esterlina fins que lo procès foguèsse menat a bon tèrme. Mas ara Escòcia a son agéncia dels impòstes e sa seguretat sociala; la transicion seriá doncas fòrça mai aisida que fa cinc ans.
Our front page exclusive: Nicola Sturgeon unveils her new vision for independence in major article for us as she urges members to back her economic plan #indyref2pic.twitter.com/EHHuupiBBf
— The National (@ScotNational) 19 d’abril de 2019
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#6 D'efièch, i a una ambiguïtat qu'a ieu tanben me tafura. Aqui ont Brussèlas consideraria amb orror una independencia de Catalonha, gaitaria al contrari amb benvalença aquela d'Escocia. Non pas per saludar l'accession a la sobeiranetat d'un poble (que quand s'agis de Catalonha ne'n vol sustot pas ausir parlar) mas perque aquo castigaria Englatèrra d'aver ausat sortir de l'Union Europenca. Aquel dos pes doas mesuras lo constatam tanben dins los medias franceses qu'an escopit sul voler d'independencia catalana mas que se regausissan jà d'una independencia d'Escocia que faria plan cagar Englatèrra.
La ximpleta de Nicola sembla mai a favor de las finanças de l'Union Europea e sos bancs privats ultracapitalistas , que de voler defensar lo poble escocès. E amai, s'han de posar d'acord abans amb lo Govern de Londres.
#4 Se vei que setz pas un lapin de sieis setmanas, setz mai fin qu'un rainard, mas dijatz-nos, d'ente tenetz quelas informacions tan secretas?
L'om creu se battre per la democracia mas l'òm se bat per daus milardairis.
Pas d'ilusion sus los que dirigean Escosian. Son au poder per la volontat de la Finança pas per la volontat dau pòple; son au servici de la Finança.
Per veire se capitan aqueste còp, per desfar lo verrolh dels estats-nacion e bastir l'Euròpa que respècte l'òme e la natura e pas la finança e las multinacionalas!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari