Uèi, 23 d’abril, se celèbra un còp de mai la fèsta de Sant Jòrdi. D’un costat, es lo jorn internacional del libre, mas de l'autre es sustot una jornada fòrça especiala en Catalonha, que lo nòstre país fraire s’emplís de taulièrs de libres, d’escrivans que signan e de mond que s’ofrisson un libre e una ròsa en tot festejar lo jorn de l’amor  e revendicar la cultura. Aquela jornada se seguís fòrça en Occitània. Mas ongan a Tolosa, las violéncias policièras an fan mancar l’eveniment. Ne parlam amb Mireia Baeta, la votz catalana de Ràdio Occitània, e amb Franc Bardòu, poèta e escrivan occitan, qu'organizavan l'eveniment.

A Tolosa, l'associacion La Veu dels Països Catalans, los occitanistas e lo collectiu dels catalans de la Ciutat Mondina, pòrtan, lo dissabte pus pròche del 23 d’abril, de libres e de ròsas sus la Plaça de Sant Jòrdi. Ongan, tot èra previst per o installar tot dissabte passat. Mas aqueste dissabte se presentava pas segur. “Los gases lacrimogèns arriban cada dissabte sus aquela plaça dempuèi las principalas artèrias de la vila. Gasan la plaça sense prene compte que i a de mond que son a dinnar o a sopar sus las terrassas”, çò explica Baeta.
 
De son caire, Bardòu precisa: “Es sempre çò meteis cada dissabte: 1) Agressions policièras injustificadas 2) Reaccions violentas dels manifestants 3) Los mèdias dominants declaran que las manifestacions son agressivas e justifican aital, a posteriòri, l’agression iniciala que la pòrtan los policièrs armats contra de ciutadans desarmats e inofensius… 4) La majoritat de la populacion se tròba portada a creire que sèm agressius, mentre que sèm agressats.”
 
Justament a causa d’aquelas violéncias policièras, decidiguèron d'anullar la fèsta. “Ensagèrem de nos entresenhar e la polícia municipala nos desconselhèt de far la fèsta”, çò ditz Baeta en soslinhant qu'es la quita polícia que li expliquèt çò dels gases lacimogèns. “Enfin, la comuna nos diguèt que nos liurariá pas las taulas ni mai las barrièras, mas enebiguèron pas l’eveniment. Decidiguèrem d’anullar”.
 
Baeta recebèt una telefonada de la comuna a 14h05 per saber s’èran sus la plaça. A 14h30, la brigada anticriminala de la polícia (BAC) agarriguèron las gents de la plaça.
 
 
L’ataca
 
Sus la plaça i aviá dos catalans, venguts de Perpinhan. “Èran venguts a Tolosa per la nòstra celebracion de Sant Jòrdi”, çò explica Bardòu que los reconeguèt. “Al moment qu’èrem a parlar, la BAC a atacat lo lor cortègi e sèm estats desseparats pels movements de las gents qu’espaurugavan las violéncias policièras”, çò rapòrta l’escrivan.
 
“A ma coneissença, los dos catalans non son estats nafrats. Una dòna de 75 ans, ela, es tombada davant ieu e s’es nafrada dins la casuda, en s’escanant amb lo gas d’assaut espandit sistematicament subre los manifestants, sens rason. Quand ai volgut tornar als mieus perpinhaneses per contunhar de parlar amb eles, non los ai pogut retrobar dins las milanta gents, que manifestavan e cridavan a la polícia qu’èran faissistas. Car o èran, o son e o demoraràn tant qu’agiràn de tal biais de manténer non pas l’òrdre, mas la paur, e mai la terror d’anar manifestar”, çò conclutz.
 
La setmana precedenta, la polícia panèt qualques bandièras occitanas e un drapèl catalan amb violéncia, un fenomèn jamai observat abans dins una manifestacion tolosana.
 
 
Segon l’ÒNU, França “restrench de manièra desproporcionada” lo drech de manifestar
 
D’expèrts de l’ÒNU denonciavan en febrièr passat de restriccions grèvas als dreches dels manifestants Gilets Jaunes. “Lo drech de manifestar en França es estat restrench de manièra desproporcionada” al temps de las manifestacions dels Gilets Jaunes, e “las autoritats deurián repensar lors politicas en matèria de mantenement de l’òrdre per garentir l’exercici de las libertats”, çò afirmavan.
 
E mai los expèrts deploravan que foguèsse “inquietant de veire malgrat de setmanas de recampaments, las restriccions e las tacticas per contrarotlar los manifestants e l’usatge de la fòrça”.
 
 
En mai d’aquò, 35 oftalmològs de renom an demandat la supression de las dichas balas de defensa (LBD), inquiets d’una “epidemia de plagas ocularas gravissimas”. Tanben l’Observatòri de las Practicas Policièras reclama la supression d’aquelas municions e d’autras “armas subletalas”.