Quatre punts que fan de ben pels catalans
 
Dijòus, los catalans tornavan trapar lo camin de la victòria sus la pelena sintetica de Londres: 39-6, alara que Wakefield remontava quasiment 20 punts mas perdiá a Castleford: 28-26. Lo divendres, lo dèrbi d’Hull virèt a l’avantatge del FC qu’umilièt KR: 56-12. Leeds mostrava sa montada en poissença fàcia als Gigants d’Huddersfield: 38-18. Saint Helens fa lo trauc en cap de classament aprèp sa larga victòria a Wigan 36-10 e mercé a la desfaita-suspresa de Warrington sus sa pelena fàcia a Salford: 36-12!
 
Diluns, los catalans recebián los Tigres de Castleford a Brutus. Signèron una polida victòria amb 6 ensages marcats (los 6 transformats per Sam Tomkins) e un tombat per ganhar 37-16. Quatre punts de preses al classament e + 54 per una diferéncia de punts restablida a de proporcions mai justas.
 
Aqueste dissabte, los Sang e Aur tornaràn trapar los primadièrs Saint Helens abans un novèl desplaçament cò d’Hull FC. E justament, St Helens ven de passar un 62-16 a Hull FC.
 
Autras resultas d’aqueste diluns de Pascas: Hull KR torna prene 50 punts fàcia a Warrington 6-54; Wigan ganha a Salford 30-26; Wakefield bat Leeds 26-24 e novèla desfaita de Londres cò d’Huddersfield: 19-24.
 
 
Tolosa jos las urpas de las Aglas
 
Divendres, Tolosa patiguèt quicòm cò de las Aglas de Sheffield: desfaita neta 44-16. Diluns, a Blanhac, lo TO se reprenguèt e Halifax paguèt la factura: 56-4.
 
Dissabte de vèspre, los occitans reçaupràn York a Blanhac.
 
 
Carcassona e Lesinhan s’escapan
 
Dissabte, Lesinhan domina una formacion catalana apatica dins lo segond temps: 36-10; Carcassona capita de contrar Vilanòva e marca de punts en fin de partida per ganhar 30-16. Avinhon resistís al retorn de Tolosa: 22-16.
 
Dimenge, Limós se va impausar a Sent Gaudenç: 36-26, e Nittim Pedrero marca un ensag dins la prolongacion per qu’Albi ganhe a Palau: 42-38!
 
Los albigeses ne profièitan per prene la 5a plaça del classament a Vilanòva. Las desfaitas de Palau e Sent Gaudenç demesisson fòrtament los espèrs de qualificacion de las doas formacions.
 
Dissabte, Carcassona jogarà a Albi. Dimenge, Limós reçauprà Palau. Son tanben al programa d’aquesta 16a jornada del campionat: Vilanòva-Lesinhan, Avinhon-St Gaudenç e Dragonets-Tolosa.
 
 
Austràlia: Greg Inglis arrèsta
 
En primièra pagina de l’actualitat tretzista en Austràlia, l’arrèst de Greg Inglis, a 32 ans, aprèp 263 partidas jogadas en NRL. Mai d’un còp nafrat, arribava pas de tornar trapar un bon nivèl. Pensa de venir entraïnaire. A son palmarès: tres títols de campion NRL, un títol de campion de Mond amb Austràlia (2013), 39 seleccions per Austràlia, 32 participacions als Estats d’Origina (18 ensages marcats per Queensland).
 
Pel campionat, los Poletons son anats batre la Tempèsta de Melbourne al punt en aur: 21-20. Las doas formacions son en cap del classament amb 5 victòrias per 6 partidas jogadas coma los Lapinons e los Raiders.
 
 
 
 
Alan Roch