L’autoproclamat Estat Islamic a revendicat la tièra d’atemptats terroristas que la patiguèt Sri Lanka aqueste dimenge de Pascas. L’organizacion a dich, per mejan de son agéncia d’informacions Amaq, que los assalhidors èran de “combatents de l’Estat Islamic”. Pasmens, an pas fornit cap de pròva d’aquela revendicacion.
 
La polícia d’Sri Lanka a ja arrestat trenta personas e a assolidat que lo responsable seriá un grop jihadista local. Ça que la, dimenge, lo govèrn diguèt que sospechavan que los agressors avián agut l’ajuda d’un “ret internacional”. “Cresèm pas qu’aqueles atacs foguèsson menats a bon tèrme per un grop de personas confinadas dins aqueste país. I aguèt un ret internacional sens lo qual aquelas atacas aurián pas reüssit”, çò declarèt lo pòrtavotz de l’executiu, Rajitha Senaratne, del temps que lo president del país, Maithripala Sirisena, demandava una ajuda internacionala per examinar los ligams estrangièrs amb los atemptats.
 
 
Sièis explosions dins tres glèisas e tres ostalariás
 
Lo bilanç del masèl es de 321 personas mòrtas, dont 45 enfants, e d'unes 500 nafrats, segon de donadas de l’ÒNU.
 
Dins un relambi de mièja ora, de matin, i aguèt sièis explosions dins tres glèisas e tres ostalariás de luxe. Pus tard, resclantiguèt una setena expolision al jardin zoologic nacional de Dehiwala e puèi encara una ochena dins un quartièr residencial. Dins las darrièras doas atacas las victimas foguèron cinc policièrs. La soleta ataca contra la glèisa de Sant Sebastian de Negombo faguèt un centenat de mòrts.