Lo pòble waorani, de l’Amazonia de l’estat eqüatorian, a ganhat sa primièra batalha contra las societats petrolièras. La justícia d’aquel país a enebit l’intrada d’aquestas entrepresas sus lors tèrras.
 
Los waoranis avián portat a la justícia una decision del govèrn actual d’Eqüator, que permetián l’esplecha de 180 000 ectaras de lors tèrras per n’extraire de petròli. Lo tribunal de la vila de Puyo a decidit d’acceptar de protegir aquel airal. Los jutges, menats per la magistrata Pilar Araujo, an determinat qu’existís un mancament al drech constitucional e a la libertat dels pòbles. A mai, lo tribunal ditz qu’una tala esplecha de ressorsas non renovelablas se deuriá preveire après consultar lo pòble en li garentissent que poguèsse decidir liurament e plan informat.
 
 
“D’aiga òc, pas de petròli!”
 
Los waorani festegèron la decision per las carrièras de Puyo. La justícia lor a permés de servar çò qu’eles considèran coma lo darrièr canton de lors tèrras que rèsta natural dins son estat original. Celèbran lo fach que vendràn pas los kowori (estrangièrs, en lenga wao terero). Cridavan “La selva se vend pas, la selva se defend” e “D’aiga òc, pas de petròli!”.
 
 
Una consulta amb d’enganas
 
De son caire, lo govèrn d’Eqüator assegura que las societats petrolièras an drech d’esplechar aquelas tèrras gràcias a una consulta facha en 2012. Mas los waoranis afirman que per aquel vòte los foncionaris arribèron en avionets e obtenguèron lo sosten popular amb d’enganas, de manjar e de bevendas. L’estat “consultèt pas, faguèt pas qu’una simpla vesita, una simpla socializacion de mièja ora, ont èra impossible que se posquèsse arribar, per mejan d’un procediment culturalament convenent, a caduna de las personas que vesitèron dins aquela socializacion”, çò assolida l’avocata Yajaira Curipallo, defensora dels dreches del pòble dins la província de Pastaza, e que sosten los waoranis.
 
Los waoranis son un pòble d’aperaquí 4800 personas. Son proprietaris d’environ 800 000 ectaras de selva dins las províncias de Pastaza, Napo e Orellana, sus l’Amazonia de l’estat d’Eqüator. La lei eqüatoriana reconeis la jurisdiccion indigèna, mas ten poder sus l’estat del sossòl.
 
 

 

FALLO HISTÓRICO A FAVOR DEL PUEBLO WAORANI!
Juez dictaminó sentencia a favor del pueblo @WaoResistencia reconociendo la vulneración del derecho a la consulta previa libre e informada y a la autodeterminación . #ResistenciaWaoranihttps://t.co/cpEHQvzXe7pic.twitter.com/bt2h3v4Igm

— Waorani Resistencia Pastaza (@WaoResistencia) 26 d’abril de 2019