Segon lo president de Veneçuela, Nicolás Maduro, l’ensag de còp d’estat de Juan Guaidó amb lo sosten de qualques militars auriá pas capitat. Dins un discors institucional, Maduro desmentiguèt d’èsser partit en Cuba, coma o afirmavan los Estats Units. De son costat, Guaidó aviá ensajat de prene lo poder amb lo sosten de l’armada. Ara a cridat a participar a una manifestacion contra Maduro. Mentretant, l’opausant Leopoldo López a sa familha se son refugiats dins l’ambaissada d’Espanha.
 
Nicolás Maduro diguèt que qualques soldats foguèron enganats per lors oficièrs per se rebellar contra lo govèrn, mas que, quand se ne foguèron avisats, tornèron lor leialtat al govèrn de Maduro.
 
A Caracas, se viu de tensions entre los partisans de Maduro e de Guaidó del temps que dels Estats Units arriban de messatges que Russia e Cuba qualifican d’intoxicacions. L’Union Europèa a fach una crida a la moderacion maximala per evitar la pèrda de vidas umanas.
 
Darrièrament, Maduro a resistit a d’atacas de drònes, a de menaças d’intervencion dels Estats Units, a de provocacions sortidas dels estats vesins amb lo president colombian Duque e lo brasilièr Bolsonaro, a una rebellion militara mancada a Caracas, a de mobilizacions de l’oposicion amb la tòca de lo destituir, a l’autoproclamacion d’un president non elegit que ten lo sosten de Trump e de l’UE, a un endurciment de las sancions financièras e del blocatge comercial estatsunidenc, a de cantatges e a d’operacions de la falsa bandièra a l’entorn de l’ajuda umanitària, a fòrça sabotatges electrics e ara a la crida a un còp d’estat militar.