Segons unes especialistas d’esoterime lo Puèg de Bugarag, dreiçat a costat del vilatge del meteis nom, seriá l’unenc endreit del planèta a èsser esparnhat de la fin del mond prevista pel 21 de decembre de 2012. Dempuèi ja fa un fum de meses la premsa e las televisions internacionalas n’an fait un larg resson. Parlan d’un calendièr maia, de movements new-age, d’una pista d’aterratge pels U.F.O. al dintre del puèg, d’extraterrèstres en visita.

Las gents ben-pensant jutjan los que s’intèressan al Puèg per de rasons esotericas o espiritalas coma una brava còla de hippies, d’illuminats e ideoses, de somiares e originals de tota mena. D’idèas sensasionalistas son espandidas per d’unes mejans de comunicacions pas gaire serioses: de bunkers anti-apocaliptics serián estats bastits a l’amagada, de sèctas ja aurián colonizat los bòsques a l’entorn, de desenas de milierats de personas ja aurián pres rendètz-vos a Bugarag pel Jorn-J.
 
Anèri dissabte passat me passejar per la carrièras de Bugarag. Fasiá una fred que pelava. La natura d’aqueste ròdol es d’una beutat esbleugissenta. Lo somalh del puèg èra cobert d’una capeta de nèu e de conglaç e protegit per una cobèrta de nívols. Supèrbe! A ne copar lo buf! Las carrieròtas del vilatge èran gaireben desèrtas: una punhada de curioses èran aquí a prendre fòtos e a gaitar los panèus de carrièras, totes escrites en occitan, una qualitat que s’amerita d’èsser presada.
 
Anèri parlar amb un comerçant del vilatge, una persona fòrça simpatica e aculhidoira. Es un apassionat del puèg, tant de pel siu costat de meravelha de la natura que de per las siás caracteristicas telluricas e misticas. L’òme expliquèt que i a pas cap de bunker a Bugarag, que contrariament a çò que d’unes que i dison, lo prètz de l’immobilièr a pas pujat. Me diguèt amb onestetat que d’unes abitants volián aprofitar d’aqueste estrambòrd per logar de cambras a de preses indecents, mas que se ravisèron lèu-lèu. E puèi me parlèt del dispositiu policièr d’estat qu’èra previst pel periòde d’aqueste “fin de mond”...

Un centenat de gendarmas seràn desplegats sul canton: la mitat sul puèg, l’autra mitat dins una zòna de seguretat. L’accès a la montanha serà proïbit del 19 al 23 de decembre. L’accès al vilatge serà reservat als abitants o a lors amics e se farà sus presentacion d’un daissa-passar! Pel cas que i agèsse una afluéncia tròp fòrta, centenas d’autres gendarmas poirán èsser mobilizats rapidament. Oficialament las rasons a aquela mesa en quarantena de Bugarag es la páur dels suicidis collectius coma per exemple lo de l’òrdre del temple solar en Soïssa, ja fa qualques annadas. Oficialament....

Çò oficial es una causa, mas çò real n’es una autra. Òm se pòt legitimament demandar perqué un desplegament de militars tant nombrós coma aquò es previt. Lo dispositiu sembla completament disproporcionat al par dels dispositius que son preses per d’autras manifestacions d’aquela mena. Las rave-parties concentran pas tant de gendarmas malgrat que pòscan èsser luòcs de perilh. Los barris de delinquéncia de las grandas ciutats son endreits perilhoses e pr’aquò l’estat ne tanca pas jamai l’accès. Benlèu las autoritats de l’estat possedisson informacions que lor fa pensar que i a un risc vertadièr? Mas se risc i a, que necessita l’interdiccion d’anada a una part del territòri nòstre, perqué aqueste risc es pas estat difusit cap a la populacion?



Perqué lo dispositiu prevei pas sonque una susvelhança de Bugarag? Perqué prevei un tancament de la zòna?
 
Òm pòt aimar lo Puèg de Bugarag per mantunas rasons: los excursionistas, los ornitològs, los toristas de natura ne tenon pas lo monopòli. I a de monde qu’aiman lo Puèg de Bugarag perqué lai i trapan una sorga d’energia espiritala. I a de monde que l’aiman perqué i veson lo sit d’un vortex geologic, d’una zòna anti-gravitacionala, d’una interfàcia amb lo còsmos, d’una pòrta espacio-temporala. E alavètz? S’aquò es lor interés e lor plaser, n’aurián pas lo dreit d’aprofitar d’aquesta montanha nòstra? Se lor plaser es d’anar pujar lo puèg lo 21 de decembre, perqué o farián pas? La montanha nòstra es a totòm, quinas que sián las motivacions de cadun. Isolar Bugarag, quitament s’es temporari, es un prejudici a la libertat individuala de circulacion per totes los qu’i aurián volgut èsser.
 
Lo 21 de decembre, Bugarag serà benlèu lo luòc de salvament del planèta, mas çò segur es qu’en plaça d’èsser un ròdol de libertat cosmogonica, serà sustot un luòc de concentracion de l’autoritat de l’estat.
 



 
Terric Lausa