Una jutgessa britanica a condemnat lo fondador de Wikileaks, Julian Assange, a cinquanta setmanas de preson per aver contravengut a las condicions de sa libertat condicionala a l'ora de demandar l'asil politic a l'ambaissada eqüatoriana a Londres lo 19 de junh de 2012. Assange serà, probable, embarrat dins la preson de Belmarsh, al sud de Londres.
 
Assange a escotat sa senténcia. Puèi, son avocat a dich a la magistrata que, d’aqueles moments, lo jornalista viviá "de circonstàncias malaisidas" e, doncas, que faguèt "çò que, d’aquel moment, pensava qu'èra çò melhor o la sola causa que podiá far".
 
 
Extradicion als Estats Units
 
En mai d'aquò, Assange tanben se tròba davant una demanda d'extradicion als Estats Units per un supausat delicte de conspiracion amb l'analista Chelsea Manning per accedir a de donadas classadas. Es doncas uèi jutjat per un autre tribunal londinenc dins la primièra sesilha d'aquela procedura d'extradicion.
 
Per ara, lo departament de la Justícia dels Estats Units a anonciat que la detencion d’Assange seguís un mandat d’extradicion pertocant “una acusacion de conspiracion” per èsser sospechat d’aver comés “d’intrusions informaticas” dins un ordenador del govèrn dels Estats Units. Segon aquò, Assange riscariá una pena de cinc ans de preson. Ça que la, segon son avocat, Baltasar Garzón, los Estats Units seguisson l’estrategia abituala d'anonciar una carga, e puèi n’apondre d’autras. Per tant, l’afar “pòt derivar devèrs de penas pus grèvas”.
 
 
Chelsea Manning
 
Quant a Chelsea Manning, ela es tornarmai encarcerada. Una de las darrièras decisions de Barack Obama, tres jorns abans de quitar la presidéncia dels Estats Units, foguèt de comudar la pena de Manning, condemnada a 35 ans de preson per aver passat sèt cents mila documents classificats del govèrn dels Estats Units, que l’organizacion WikiLeaks difondèt puèi. La decision d’Obama arribèt tres jorns abans que quitèsse l’Ostal Blanc, en genièr de 2017. Mas la libertat de Manning es estada brèva. L’8 de març passat, tornava èsser encarcerada. La rason es qu’ela refusèt de respondre davant una jurada sus una enquèsta pertocant WikiLeaks. “Participarai pas a de procèsses secrets e ne refusi moralament un qu’es estat emplegat per arrestar e perseguir d’activistas a causa de lor discors politic”, çò diguèt segon AP.
 
Dins aquesta segonda detencion, l’an tornarmai embarrat dins una cellula d’isolament, segon çò qu’a denonciat lo grop de sosten a Manning nomenat “Chelsea Resist!”. Lo 4 d’abril passat, lo compte oficial de Twitter de la detenguda raportèt qu’avián mes fin a aquela situacion, après qu’aguèt passat 28 jorns en aquela situacion.
 
Aqueste còp, sembla que l’Ostal Blanc favorirà pas la situacion de Manning, se prenèm en compte qu’al començament de 2017 Donald Trump diguèt qu’èra una “traita ingrata” (ungrateful traitor) que “jamai deviá pas èsser mesa en libertat”.
 
Nascuda Bradley Manning, èra analista d’intelligéncia de las Fòrças Armadas dels Estats Units e passèt a Wikileaks de documents classificats sus las guèrras d’Iraq e d’Afganistan; d’autres documents provoquèron una granda polemica internacionala quand foguèron publicats en 2010.
 
Dins son jutjament, en julhet de 2013, Manning foguèt declarada innocenta del delicte d’aver ajudat l’enemic dins l’afar Wikileaks, çò que li evitèt d’èsser condemnada a perpetuitat, mas foguèt declarada colpabla dels autres dètz e nòu delictes que n’èra acusada. Manning foguèt arrestada en mai de 2010 e empresonada tres ans en esperant aquel jutjament. La mitat del temps lo passèt estremada dins una cellula de 4,46 mètres cairats.
 
 
Pendent son procès, Manning demandèt perdon. “Me grèva d’aver greujat los Estats Units”, çò diguèt.