An detengut en gàrdia a vista al comissariat de Montpelhièr Camille Halut, una jove estudianta en drech public que fa l’observaira per la Liga dels Dreches de l’Òme (LDH segon sa sigla en francés). Halut èra convocada coma testimòni al comissariat diluns passat, 29 de mai, a 9h, mas a 10h l’avián arrestada e mesa en gàrdia a vista per “entrava a la circulacion”. L’LDH denóncia una “volontat d’intimidacion”. De ser, la liberèron, çò rapòrta France 3. Una molonada s’èra recampada davant lo comissariat en sosten a la joventa umanista.
 
Los faches se passèron lo 6 d’abril pendent la manifestacion de la 21a setmana de las protèstas dels Gilets Jaunes. Camille Halut aviá la mission d’observar las manifestacions e de collectar de testimoniatges sus las violéncias policièras. Per aquela rason seguiguèt un atropament qu’aviá barrat l’estrada A709 a Montpelhièr.
 
Segon Sophie Mazas, avocata e presidenta de l’LDH del departament d’Erau, “çò que li repròchan finalament es fach per los manifestants, qu’es de lor responsabilitat alara qu’ela èra qu’en mission d’observacion”. En mai d’aquò, Mazas es inquieta per la persecucion que patisson jornalistas e reportèrs umanitaris: “Dempuèi 15 jorns, vesèm de jornalistas que cobrisson las manifestacions a èsser perseguits en justícia e es tanben lo cas ara per la Liga dels Dreches de l’Òme. Es particularament inquietant”.
 
Es pas lo primièr cop que Camille Halut a de problèmas amb la polícia dins lo quadre de las protèstas dels Gilets Jaunes. Tanben efectuèt plusors senhalaments a l’Inspeccion Generala de la Polícia francesa dicha Nacionala (IGPN) e en febrièr passat faguèt sa denóncia per insultes, après qu’un policièr qu’ela aviá filmat l’aguèt tractada de “conassa”.
 
 

[Communiqué LDH]
GAV de #CamilleHalut en raison de ses fonctions d’observatrice des pratiques policières lors des manifestations #Montpellier : la #LDH dénonce ces intimidations contre celles & ceux qui ne font qu’exercer leurs prérogatives citoyennes !
https://t.co/PWxC7f3J1Hpic.twitter.com/3klrUGIb2N

— LDH France (@LDH_Fr) 29 d’abril de 2019