En Naut Carcin, tot es lèst per la seisena edicion del festenal Escambis, l’eveniment de cultura occitana de referéncia. Après cinc ans de reüssidas, l’edicion d’ongan se tendrà del 17 al 19 de mai, a Sant Seren, Solhac, Banas, Sant Joan de la Ginèsta e Sant Miquèl lo Veson. Lo festenal Escambis es organizat per l’associacion Aquí l’Òc, e receb lo sosten de Jornalet.
 
Aquel festenal en Carcin a la particularitat de s’adreiçar a un public larg: los que parlan occitan o non, los que son d’aicí o non... Tradicion e modernitat se conjugan per far descobrir e partejar nòstra cultura e nòstra lenga. Joves e mens joves se retròban dins de domenis tan variats coma lo cinèma, la musica, la dança, l’artisanat, la literatura, la poesia, l’istòria o lo conte.
 
Ongan, lo festenal comença lo divendres 17 de mai amb un concèrt de cançons de combat occitanista dempuèi 1968 a la glèisa de Sant Joan de la Ginèsta (Limarga e Segalar Carcinòl) amb lo grop Cançons d’Òc. Seguirà un recital de cançons mediterranèas amb lo duo Sororitat.
 
L’endeman, contunharà a Banas (Limarga e Segalar Carcinòl), tant sus la plaça del vilatge coma dins la sala de las fèstas, amb un mercat artisanal, una exposicion, de productors locals, de restauracion, una beguda, un taulièr de libres, de produches culturals... al programa i aurà de conferéncias, de contes, d’aperitius amb de musica tradicionala, de repaisses (jos reservacion prèvia), de concèrts, de balètis....  De soslinhar la conferéncia-debat sul bilingüisme a l’escòla amb Gilabèrt Dalgalian e l’espectacle umoristic L’Occitanie pour les nuls de Florant Mercadièr. Clavarà la jornada un concèrt-balèti amb los grops Rémi Geffroy Trio e Forró de Fòra.
 
 
Una fornariá amb sa senhaletica en occitan
 
A l’escasença del festenal, la fornariá Bodart de Sant Seren inaugurarà lo primèr comèrci de la vila e de la region que prepause una senhaletica tanben en occitan. Se passarà dimenge 19 de mai, darrièr jorn del festenal.
 
Après dinnar, Escambis prepausa dos espectacles teatrals a la sala de las fèstas de Sant Miquèl lo Veson: d’un caire, de teatre en occitan amb la tropa roergassa Lous Rascalous, e d’autre caire d’istòrias comicas amb Gustou.
 
 
Per mai d’informacion, podètz telefonar al +33(6) 73 62 64 63, o ben escriure a asso.aquiloc@gmai... Trobaretz mai d’entresenhas e lo programa en linha sul sit  www.espacioccitancarcinol.com/.