De ciutadans, associacions e collectius de sosten a las personas en situacion de precarietat an demandat a las autoritats localas de Tolosa, e tanben a las departamentals e regionalas, qu’anullen lors dons milionaris per la restauracion de la catedrala de París, mas que priorizen las “missions pus precàrias” del país. Dins aquel sens. an aviat una campanha sus change.org.
 
Considèran que Nòstra Dòna de París es un monument important mas que depend d’autras autoritats e critican que lo Conselh Regional aja promés 1,5 milions d’èuros, lo Conselh Departamental 1 milion d’èuros e la vila de Tolosa e Tolosa Metropòli tanben 1 milion d’èuros.
 
D’un caire, demandan qu’anullen los dons promeses, de l’autre remembran que la region se tracha de la formacion e de l’ajuda a l’escolaritat del temps que lo departament s’ocupa de l’ajuda sociala a l’enfança e de las familhas qu’an de pichons mainats. D’efièch, las estructuras socialas son desbordadas pels besonhs e foncionan amb de budgets tròp basses amb un bilanç dramatic. Mençonan tanben la situacion precària que patisson las personas vièlhas e las que son en situacion d’andicap a causa  d’un budget insufisent. Enfin, avertisson que la comuna e la metropòli an de mal a afrontar l’accion sociala, la pichona enfança e la velha sociala, e soslinhan la cauma que fan los salariats del 115 per denonciar la manca de mejans umans en matèria d’albergament.
 
Ansin mençonan una tièra de mancanças socialas del temps que demandan que tot aquel argent siá redistribuït a las personas que vivon aqueles dramas de la vida vidanta. En mai d’aquò, demandan a d’autres ciutadans qu’exigiscan çò meteis sus lor territòri.

 
 

---

Se pòt signar aquela campanha sus change.org.