Lo Conselh Suprèm Electoral de Turquia a ordenat de far una nòva eleccion municipala dins la comuna d’Istambol, en seguida d’una demanda facha pel Partit de la Justícia e del Desvolopament (AKP) del president Recep Tayyip Erdoğan. Lo candidat  de l’AKP, Binali Yıldırım, perdèt contra l’opausant Ekrem İmamoğlu per un 0,2% dels vòtes. Los dos politicians tornaràn concórrer dins las urnas lo 23 de junh.
 
L’AKP, que governava la vila dempuèi 1994, denoncièt de sospechadas irregularitats pendent lo vòte de març passat e en cap de moment a pas reconegut lo resultat. Lo resultat de l’eleccion foguèt plan polemic perque lo comptatge s’èra arrestat mai d’una ora mentre que demorava de comptar pauques burèus de vòte e que lo candidat de l’oposicion davançava ja lo candidat erdoğanista.
 
Puèi, lo Conselh Suprèm Electoral, a la demanda de l’AKP, ordenèt de tornar far lo comptatge dins qualques districtes d’Istambol. Totun, lo resultat final cambièt pas. De fach, dempuèi doas setmanas İmamoğlu agís coma cònsol màger de la vila, mas amb de dificultats car la majoritat dels conselhièrs municipals son de l’AKP.
 
Lo dirigent del partit de l’oposicion a plangut la decision del Conselh electoral e a assegurat qu’“an ensajat de [lor] raubar de las mans d’eleccions que [ganhèron] de plen drech”. İmamoğlu demanda a sos partisans que protèsten pacificament. Sa formacion, lo Partit Republican del Pòble (CHP), a dich qu’aquel fach es pròpri d’una dictatura: “Es illegal de ganhar contra l’AKP. Aqueste sistèma que tomba la volontat del pòble e mesprèsa la lei es pas democratic ni legitim.