Sali Berisha prometèt una Grand Albania de fach, dins l’encastre del procès de l’integracion europèa, pendent la celebracion del centenari de l’Estat albanés. Hashim Thaçi assegura que Kosova serà lo garant dels dreches dels albaneses en Serbia e en Macedònia. Belgrad prepausa de tornar dobrir la question kosovar amb “un nòu Dayton”.

Cent ans après l’independéncia del primièr estat albanés modèrne, es mai près de se complir, lo projècte de la Grand Albania? Sembla qu’es çò que pensa lo primièr ministre albanés, Sali Berisha: “Farem realitat l’unitat nacionala dels albaneses per mejan de l’Union Europèa”, çò diguèt en una celebracion dins la capitala de Macedònia, Skopje. L’intervencion de Berisha, segon l’AFP, se faguèt davant 10 000 albaneses que cridavan “Grand Albania”, dins l’encastre dels actes de celebracion del centenari de l’Estat albanés, lo 28 de novembre passat.
 
Es pas un fach que se passa solament a Skopje, una vila ont en 2002 (an del darrièr cens), 20% de la populacion èra etnicament albanesa. La capitala de Kosova, Prishtina, se vestiguèt de roge e negre (las colors nacionalas d’Albania) aqueles jorns, segon çò que contavan divèrses jornalistas dempuèi la vila, coma lo de Le courrier des Balkans o lo jornalista Peter Geoghegan.
 
Oficialament, Kosova se pòt pas unificar amb cap d’autre estat perque o ditz la siá constitucion. Ça que la, a nivèl practic, Prishtina e Tirana tenon una seguida de projèctes comuns e son a far venir inconsistenta la frontièra entre Kosova e Albania gràcias al procès d’integracion europèu.
 
Al meteis acte ont Berisha parlava de l’unitat nacionala dels albaneses, lo primièr ministre kosovar, Hashim Thaçi, a promés als albaneses de Serbia e Macedònia que Kosova “los protegirà”.
 
 
Lo primièr ministre sèrbe a prepausat un nòu Dayton
 
Mentretant, a Belgrad, contunhan de pensar a de solucions possiblas pel conflicte kosovar. Lo primièr ministre sèrbe, Ivica Dačić, a pensat a quicòm de nòu: “un nòu Dayton”, çò diguèt, que la negociacion que metèt ponch final a la guèrra de Bòsnia serviriá de modèl per l’aplicar a Kosova. Lo primièr ministre sèrbe ne concretizèt pas los detalhs, mas los mèdias locals interpretèron la proposicion coma un ensag de redefinir l’estatut de Kosova en una conferéncia ont participen de sèrbes, de kosovars e diferentas poténcias internacionalas. Mas Dačić parlèt ben de las estructuras resultant del Dayton real en Bòsnia, e avalorèt fòrça positivament dos faches: un, qu’en Bòsnia existisca una entitat de majoritat etnica sèrba (la Republica Sèrba); e l’autre, que sens l’aprobacion sèrba, se pòsca pas far de modificacions dins l’estructura de l’Estat bosnian. Pasmens, Dačić a pas concretizat s’es exactament aquò çò que voldriá pels sèrbes de Kosova.
 
Ça que la, lo govèrn de Prishtina a refusat l’idèa e a dich que quina convèrsa que siá sus Kosova se deu manténer bilateralament entre los govèrns sèrbe e kosovar, e dins l’encastre de la mediacion de l’UE. Prishtina compren qu’aquel scenari li es mai favorable: la majoritat de païses de l’UE, en i comprenent los mai influents, reconeisson l’independéncia e l’integritat territoriala de Kosova.
 
 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.