Eth 26 de mai que ven, i aurà en Aran ua tripla eleccion. Ath delà des eleccions europèes e des municipaus, que se debanaràn en tot er estat espanhòu, es aranesi que votaràn tanben eth Conselh Generau d’Aran, eth govèrn deth país que siguec restaurat en 1990 dempús de 156 ans d’inacitivitat, e qu’ara ei refortit damb era naua Lei d’Aran.  En encastre d’aqueres eleccions se presentèc dimèrcles passat en Vielha Aran Amassa, ua organizacion d’esquèrra assembladària que vò èster ua alternatiua ath bipartidisme.
 
Er acte de presentacion compdèc damb era preséncia d’un centenat de persones que poguèren conéisher es diferentes candidatures as ajuntaments e ath Conselh Generau e eth sòn programa electorau.
 
Aran Amassa se presente enes ajuntaments de Bausen, Les, Vielha e Naut Aran coma “alternatiua fresca e renauida a tanti ans de politiques partidistes e de venda e privatizacion deth territòri e des sòns recorsi”. En aguest sens revendiquen ua manèra de hèr politica “en positiu”.
 
Es candidats municipaus que hèn ua escomesa entath dialòg, era soma d’esfòrci damb era tòca de méter ara societat aranesa ath centre, ath delà des partidismes. Deth son costat, Mireia Boya, candidata ath Conselh Generau d’Aran, afirmèc qu’Aran Amassa vò “un pòble unit que decidisque collectiuaments eth sòn futur en nom dera transparéncia, dera escomesa estrategica peth torisme, dera sostenibilitat, deth feminisme e sustot, dera unitat e dera bona atmosfèra entre vesins e vesies, sense renonciar jamès ara nòsta soberaneitat. Cambiar es formes ei cambiar eth futur, entà hèr-lo melhor”.
 
Que clauèc er eveniment er imne occitan interpretat pera cantadora Mercè Morera.
 
 
Era fin deth bipartidisme en Aran
 
Dempús dera restauracion deth Conselh Generau d’Aran, dus partits politics s’an disputat eth poder: Convergéncia Democratica Aranesa (CDA), aliada damb Convergéncia e Union, e Unitat d’Aran (UA), aliada damb eth Partit Socialista (PSÒE). En terçon d’Arties e Garòs se presente eth Partit Renovador d’Arties e Garòs (PRAG) ena plaça d’UA. Aqueri dus partits an un acòrd entà actuar amassa. Actuaument, eth Conselh Generau ei compausat per sèt conselhèrs de CDA, dont eth sindic d’Aran, cinc d’UA e un deth PRAG en acòrd damb UA.
 
Aguest bipartidisme be poderie acabar se prenem en compde que Ciutadans, partit de dreta espanholista, a boni resultats en Aran, e que s’anóncien tanben plan boni resultats entà Aran Amassa, gràcies ath hèt qu’amasse a totes es esquèrres araneses, de Corròp a ÈRC.
 
 
 
 
AA/Red.
 
 
 

Julian Sanllehy forme parte dera candidatura en #Bausen a on era pagesia ei en centre e es institucions no an de dividir es pòbles. Trabalharam toti #Amassapic.twitter.com/SSueMOHS0k

— Aran Amassa (@AmassaAran) 8 de maig de 2019

 
 

Mari Carme Alonso defense era remunicipalizacion de recorsi, servicis e espacis coma objectiu en #Vielha. És ahèrs publics són de toti e non an d'enriquir sonque a uns pòcs. pic.twitter.com/dU6MtDo1gZ

— Aran Amassa (@AmassaAran) 8 de maig de 2019

 

Era cantaira Mercè Morera mos cante cançons populars occitanes. Saber d'a on venguem entrà conprener tà on mos cau anar #Occitaniapic.twitter.com/8IZ9CWnLBj

— Aran Amassa (@AmassaAran) 8 de maig de 2019

 
 
 

AMASSA (H)èm era alternatiua from Aran Amassa on Vimeo.