La Cort de Cassacion, qu’es lo pus naut tribunal de la Republica Francesa, refusèt lo 7 de mai passat, l’apelacion del paire de Rémi Fraisse, çò rapòrta France Info. Atal, se rend definitiu lo non-luòc de l’enquèsta judiciària sus la mòrt de Rémi Fraisse, lo jove tolosan tuat en octòbre de 2014 per una granada. La lancèt un gendarma dins l’encastre de la repression d’una protèsta contra la construccion d’una restanca a Sivens (Galhaqués).
 
La familha de la victima a contestat lo quadre de l’intervencion dels gendarmas quand foguèt tuat. Lo paire, Jean-Pierre Fraisse, aviá remés en causa la causida dels jutges d’instruccion qu’estatuissián en matèria militara, denonciant una justícia “d’excepcion” pels gendarmas plaçats en mission de mantenement de l’òrdre “jos una meteissa autoritat civila”, la del Ministèri de l’Interior o del prefècte. Segon el, “la justícia es als òrdres, la rason d’estat e dels govèrns successius a prevalgut mentre que i aviá pas cap de rason, puèi que i a mòrt d’òme”.
 
La justícia aviá ja clavat l’instruccion, après mai de dos ans sens mesa en examen de quin responsable que foguèsse. Alavetz, los avocats de la familha faguèron lors denóncias contra los responsables civils e militars del drama. Dins aquel sens, se denoncièt los gendarmas per “falses testimoniatges” e “subornacion de testimònis”. En genièr de 2018, l’enquèsta s’acabèt sus un non-luòc.
 
 
Una protèsta populara ganhada, al prètz d’un òme mòrt
 
Fraisse èra un jove estudiant tolosan de botanica, que foguèt tuat a 21 ans dins la nuèch del 25 al 26 d’octòbre de 2014, dins l’encastre de la repression d’una protèsta populara que comencèt d’un biais plan pacific contra la construccion d’una restanca dins la zòna umida del Testet, a Sivens (Galhaqués).
 
Al començament del mes de julhet, la justícia donèt rason als opausants de la restanca de Sivens. Foguèron anulladas la declaracion d’utilitat publica, l’autorizacion d’eissartatge e la derogacion sus las espècias protegidas. E mai l’estat foguèt condemnat a pagar 3750 èuros a las associacions. “Aurà calgut un mòrt per que tot s’arrèste”, çò diguèt Ben Lefetey, pòrtavotz del collectiu Testet.
 
Lo gendarma que lancèt la granada mortala sus Rémi Fraisse foguèt plaçat en març passat jos l’estatut de testimòni assistit. Foguèt entendut per de jutges de Tolosa dins l’encastre de l’informacion judiciària dobèrta per “violéncias volontàrias qu’an entraïnat la mòrt sens intencion de la donar”.
 
De fach, la mòrt de Rémi Fraisse portèt la crisi al govèrn francés. Las nombrosas susmautas qu’esclatèron per tot l’estat francés, en seguida de la mòrt de l’estudiant de botanica, portèron de problèmas al govèrn de la Republica.
 
Lo govèrn francés ensagèt de reglar la mòrt del jove tolosan en enebissent l’usatge de las granadas e en suspendent los trabalhs del barratge, mas un larg sector de la societat, los movements ecologistas e de partits d’esquèrra demandèron la demission del ministre Cazeneuve, que se limitèt a dire que i auriá “de sancions se s’es comés de fautas”. Las protèstas e las susmautas percorreguèron tot l’estat, la majoritat amb d’afrontaments violents entre manifestants e policièrs.