Al delà del crime de Seta, l’aumentacion de la violéncia dins lo país es fòrça inquietanta. La dimenjada passada, se son debanats encara quatre assassinats almens.

Una avocata esgorjada a Marselha
 
Divendres passat, una avocata foguèt trobada mòrta pel sieu sòci dins lo sieu gabinet, a la Carrièra Sant Ferriòu, près del Pòrt Vièlh de Marselha. La victima foguèt trobada esgorjada amb un cotèl o un cutèr.
 
Al moment de la descobèrta del còrs, de dorsièrs foguèron trobats lançats al sòl per tot lo gabinet. Los enquestaires seguisson divèrsas pistas: benlèu s’agís d’un client vindicatiu, d’una persona implicada dins un dorsièr, d’un panaire que voliá de sòus…
 
La victima, Raymonde Talbot, èra maridada, maire de familha e originària de Corsega.
 
 
Un menaire d’escotèr reversat a Marselha
 
Dissabte a 22h, dins lo tranquil quartièr de Castèugombèrt de Marselha, un menaire d’escotèr de 39 ans foguèt tuat, percutit per una veitura panada que prenguèt la fugida.
 
Dins la veitura viatjavan sièis personas, que doas d’entre elas son estadas interpeladas.
 
 
Un òme d’aperaquí 30 ans escotelat a Sauve
 
Qualques oras puèi, aperaquí a 1h30, un òme de qualques trenta ans foguèt mortalament escotelat a la sortida d’una serada d’anniversari que se debanava dins una sala comunala de Sauve (Garrigas).
 
Lo presumit agressor, qu’aviá passada la serada amb la victima, prenguèt la fugida e es recercat pels gendarmas.
 
 
Un òme de 31 ans tuat per arma de fuòc al Grau dau Rei
 
A 6h, un montpelhierenc de 31 ans foguèt tuat per arma de fuòc sul pargatge, just davant la discotèca La Mezza Notte al Grau dau Rei (Camarga). Tres còps de fuòc serián estats tirats en l’aire e un darrièr tir mortal al cors d’una batèsta.
 
Lo suspècte, dins sos 20 ans, seriá anat quèrre l’arma a la veitura abans de tirar contra la victima. Segon l’AFP, lo presumit omicida es ja conegut per la polícia per usatge d’estupefasents, e ara es a la seccion de recèrcas de la gendarmariá de Nimes.