Una novèla chifra de notar: 31 555. Es lo nombre d’espectators qu’an seguit lo rescontre Dragons-Wigan aqueste dissabte de vèspre al Camp Nòu de Barcelona. Es la novèla mai bèla afluéncia per una partida de la sason de classament de la Superliga (anciana mai fòrta: 25 004).

Camp Nòu: los Dragons a la nautor de l’eveniment
 
Mai de 170 autocars avián pres la rota de la capitala catalana dempuèi Catalonha Nòrd, Aude, País Tolosan e Provença. Los avions avián transportat 5 000 sostens de Wigan per se trapar a l’entorn de la pelena verda, sens una èrba que despassèsse, mai corta de 6 mètres a respècte dels terrens oficials de XIII. Mas la Superliga aviá autrejada la derogacion: entre los 40 m e los 30 mètres, la distància èra de … 7 mètres!
 
Un aire de fèsta amb los castellers, Els Segadors amb Albert Bueno apiejat per 50 coristas de la Generalitat, lo president de la Generalitat aviá pres plaça a la tribuna oficiala. Los independentistas despleguèron doas bandeiròlas: una amb lo mot “Independéncia”; l’autra, en anglés, per dire que l’autodeterminacion es un dreit e pas un crime.
 
Los Dragons jogavan la partida sens Sam Tomkins nafrat e perdèron Greg Bird tocat a l’espatla al cap d’un quart d’ora de jòc. Los Sang e Aur dobriguèron la marca mercé a una penalitat de Gigòt, puèi MacIllorum marquèt un ensag de talonaire amb un despart darrièr lo tengut. Una marrida recepcion del còp de remandadís anava obligar los catalans (valent a dire los occitans, australians, angleses e autres de Papoa, Samoa, Fiji…que pòrtan lo malhòt sang e aur) a defendre e a téner còp pendent de longas minutas. Los catalans tornèron dominar la fin del primièr temps: los angleses ne profeitèron per marcar sus una ataca que remontèt tot lo terren. 8-6 pels catalans a la pausa.
 
A la represa, Sam Kasiano arrancava la pauma a un anglés e lançava Mead que marcava, puèi lo pilar sang aur emportava tres angleses per puntar l’ensag al pè dels pals. Sul còp de pè de remandadís, lo centre Williame en plaça de lançar un davant (coma se fa 999 còps sus 1000) partissiá lo long de la tòca, èra représ als 30 m angleses mas la cadena de tenguts s’acabava per un ensag signat Langi. Mead marcava son segond ensag de la vesprada sus intercepcion. Amb las transformacions e un tombat de Gigòt, lo planchòt indicava: 33-6. Dins las tribunas, las èrsas[1] fasián levar l’estadi, lo Sang e Aur senhorejava… Coma un anglés abandona pas jamai, abans la còrna, Wigan marquèt dos ensages per tornar menar la marca a 33-16.
 
Aquesta victòria permet als catalans de se plaçar en tresena posicion al classament abans la Dimenjada Magica.
 
Lo cap de fila, St Helens, s’es vist las pèiras per batre Salford 32-30; lo segond Warrington se fa batre sus sa pelena per Hull FC 12-19; lo darrièr Londres bat Wakefield 42-34; Leeds pòt  pas res contra los Tigres de Castleford: 8-30 e los Gigants d’Huddersfield dominan Hull-KR: 30-22.
 
 
Aprèp lo Camp Nòu, Anfield Road
 
Los Dragons perseguisson la virada dels estadis mitics de fotbòl. Aprèp lo Camp Nòu, direccion Liverpol ont dobriràn la Dimenjada Magica amb una partida contra Wakefield (dissabte, 15h). Partida seguida pels afrontaments Hull FC-Huddersfield (17h30) e Wigan-Warrington (20h). Dimenge, se jogaràn las tres partidas: Salford-Hull KR (14 h); Leeds-Londres (16h30) e St Helens-Castleford (19h).
 
E Tottenham a ja prepausat son estadi tot nòu per la tenguda de l’edicion de 2020 de la Dimenjada Magica!
 
 
Championship: Toronto tròp fòrt
 
En Championship, èra lo temps del Summer Bash: 7 partidas en dos jorns jogadas a Blackpool. Los tolosans poguèron pas res contra Toronto: 42-14.
 
Dissabte, los occitans tornaràn trapar la pelena de Blanhac e reçaupràn los Centurions de Leigh (15h).
 
 
NRL: Melbourne sus la fin
 
En Austràlia, Melbourne espèra las darrièras minutas per batre los Tigres de l’Oèst: 24-22. Aprèp una debuta de sason complicada, Brisbane pren gost a la victòria e bat los Polets de Sydney 15-10. Los primadièrs, los Lapinons, s’impausan a Canberra 16-12. Los neozelandeses (30-10 a Penrith), los Dògols (22-16 fàcia als Titans), Newcastle (45-12 a Sant Jòrdi), Manly (24-12 a Cronulla) ganhan tanben al defòra.
 
 
Elèit 1: Un Limós-Lesinhan indecís
 
En Elèit 1, quatre partidas son al programa de l’avantdarrièra jornada, vist que Tolosa-Albi se joguèt ja en genièr (victòria de Tolosa: 34-8). En cap d’aficha, lo dèrbi dimenge a l’Agulha entre Limós e Lesinhan aprèp una taulejada ont los Roge e Negre celebraràn los jogaires (los “immortals”!) qu’an portat al mens dètz ans lo malhòt limosenc. Carcassona voldrà confirmar sa primièra plaça a Palau; Vilanòva ensajarà de somiar encara a la quatrena plaça e un barratge a domicili amb la recepcion d’Avinhon. Los Dragonets se deurián logicament impausar a Sent Gaudenç.
 
 
 
 
Alan Roch