Seguida de la crisi politica que la travèrsa Àustria. Après la demission del vicecancelièr d’extrèma drecha, Hainz-Christian Strache, tocat per un escàndol de corrupcion, e l’anóncia d’eleccions anticipadas, ara lo govèrn a expulsat totes los ministres ultradrechistas de l’FBÖ, partit qu’èra en coalicion de govèrn amb lo Partit Popular Austrian (ÖVP).
 
Ara es fòrça probable que lo cancelièr nomene de tecnocratas per assumir los ministèris fins a la convocacion de las eleccions previstas per setembre. Lo principal partit de l’oposicion, lo Partit Socialdemocrata d’Àustria (SPÖ) a demandat tanben la demission del cancelièr e la formacion d’un govèrn de tecnocratas fins a las eleccions.
 
Strache, qu’èra tanben lo clavaire del partit ultradrechista, demissionèt dissabte del govèrn austrian e de son partit en seguida de la publicacion d’un vidèo que lo mostrava a acceptar de subornacions. Lo filme, publicat per los jornals alemands Der Spiegel e Süddeutsche Zeitung, mòstra Strache a prometre de mercats publics en contrapartida de recebre d’argent negre per finançar sa campanha electorala. Se tracta d’un enregistrament fach amb una camèra amagada fa dos ans a Eivissa, pauc de temps abans las eleccions en Àustria. Après l’escàndol de la demission de Strache, Kurz expliquèt que lo voliá pas pus a son costat.