Lo burèu del Congrès dels Deputats espanhòl a decidit de suspendre coma deputats los quatre presonièrs politics independentistas catalans elegits lo 28 d’abril passat, çò es Junqueras, Jordi Turull, Josep Rull i Jordi Sànchez. O a fach amb los vòtes del Partit Socialista (PSÒE), del Partit Popular (PP) e de Ciutadans. Los representants del partit esquerrista espanhòl Podèm se son prononciats contra en assegurant que s’agís d’una “violacion dels dreches dels deputats”.
 
La presidenta de la cambra bassa espanhòla a dich dins una conferéncia de premsa que se tracta d’una “situacion inedita” mas que o an fach per “salvagardar las institucions e defendre los dreches de totes los deputats de la cambra”.
 
La decision l’an presa dins un encastre fòrça polemic. Los elegits que volián suspendre los independentistas catalans demandèron a la Cort Suprèma espanhòla que suspenguèsse los presonièrs elegits, mas los jutges diguèron que la decision la deviá prene lo burèu de l’assemblada.
 
 
Camin liure per Pedro Sánchez
 
Amb la suspension d’aqueles quatre deputats, lo cap del PSÒE, Pedro Sánchez, poirà èsser investit president sens problèma car, sens aqueles quatre vòtes negatius, li bastarà d’aver los vòtes dels deputats socialistas se tenon lo supòrt de Podèm, dels autonomistas bascos, valencians, e dels regionalistas de Canàrias e Cantàbria.
 
 
Dimècres, lo Senat decidirà la suspension de Romeva
 
Quant a Raül Romeva, elegit senator, serà lo burèu del Senat espanhòl que decidirà dimècres que ven, 29 de mai, se lo suspend.
 
 
“Nos an suspenduts en Espanha mas o poiràn pas far en Euròpa”
 
De lor caire, los partits dels elegits suspenduts, Esquèrra Republicana de Catalonha (ÈRC) e Amassa per Catalonha (JxCat), an denonciat “un còp d’estat contra l’estat de drech” e que l’estat espanhòl “los vòl amudir” e an soslinhat que la suspension seriá impossibla en Euròpa. “Un presonièr politic qu’intra al Parlament Europèu es lo melhor biais de denonciar la repression de l’estat espanhòl, e de lo metre en escac davant tota Euròpa”, çò dich Junqueras sus Twitter.
 
 
“Refusar la presompcion d’inocéncia resòlv pas res”
 
De son caire, Jòrdi Sànchez a assegurat que “refusar la presompcion d’inocéncia e destòrcer lo reglament resòlv pas res”. Atal, Sánchez afirma que “de la preson estant e coma deputat elegit” contunharà” d’escometre sul dialòg e sus la democracia”.
 

Ens han suspès a Espanya però no ho podran fer a Europa! #26M
Un pres polític entrant al Parlament Europeu és la millor manera de denunciar la repressió de l’Estat Espanyol, és posar en escac a l’Estat davant de tota Europa! https://t.co/BXrVPICyT8

— Oriol Junqueras  (@junqueras) May 24, 2019

 

Marchena guanya el pols a Batet
El Congrés ens acaba de suspendre, sense el suplicatori que estableix l’art. 21.2 del Reglament
Negar la presumpció d’innocència i tensar el Reglament no resol res. Des de la presó i com a diputat efecte continuo apostant pel diàleg i la democràcia pic.twitter.com/l0LYjdx8aJ

— Jordi Sànchez (@jordialapreso) May 24, 2019

 
Lo jutjament s’acabarà l’11 de junh que ven
 
Mentretant, lo jutjament, que comencèt lo 12 de febrièr passat, serà mes en deliberat l’11 de junh que ven. Totes los acusats son enseguits per aver organizat o permés lo referendum d’independéncia de Catalonha e Aran lo 1r d’octòbre de 2017, e son acusats de rebellion, violéncia e sedicion; riscan de penas de fins a 25 ans de preson. Per ara, los observaires internacionals d’International Trial Watch denóncian la manca d’imparcialitat del tribunal.