Lo procuraire de la Republica de París, Rémy Heitz, diguèt ièr dissabte que lo responsable de l’atemptat que lo patiguèt ièr Lion, e que nafrèt tretze personas , es totjorn recercat. L’eveniment se tenguèt divendres devèrs 17h30 quand un òme encagolat en bicicleta daissèt un còlis explosiu en Carrièra de Victor Hugo, dins la capitala arpitana. La polícia a difusat l’image del suspècte pres per las camèras de seguretat.
 
L’explosion daissèt tretze personas nafradas, dont un enfant de dètz ans. L’èx-ministre de l’Interior francés e cònsol màger de Lion, Gerard Collomb, assegurèt ièr dissabte dins una entrevista concedida a BFMTV que solament tres ferits demoravan a l’espital, un d’eles amb de lesions grèvas, e mai sa vida foguèsse pas en perilh.
 
Lo ministèri public antiterrorista estúdia los faches coma un possible acte de terrorisme, e mai Heitz aja soslinhat qu’a l’ora d’ara cap de grop ni individú a pas revendicat l’atac. Lo Ministèri de l’Interior francés a decidit de refortir la seguretat dins los sits publics e los eveniments esportius, culturals e religioses coma mesura de prevencion.