Los parents dels enfants delegats de doas escòlas de Montpelhièr se son mobilizats per que lors enfants pòscan contunhar lo cursus d’occitan. En setembre que ven, la pus primièra classa d’occitan formada fa sièis ans farà sa rintrada al collègi, e revendican lor drech legitim de perseguir l’ensenhament dins la lenga del país.

 

A l’ora d’ara, un trentenat d’enfants an la possibilitat de començar un percors bilingüe francés-occitan a l’escòla mairala Francis Garnier. Lo pòdon perseguir a l’escòla elementària publica Marie de Sévigné fins al CM2. Mas après an pas res per lo.contunhar fins a l’universitat, precisament a Montpelhièr.

 

Per tant, an mes en linha una peticion sus Change.org que demanda la signatura de totas las gents solidàrias amb lor revendicacion.

 

“Sembla que la volontat es pas pus aquí per metre en plaça la continuitat pedagogica del cursus”, çò dison los peticionaris, del temps qu’asseguran qu’après tot l’esfòrç per aver mes en òbra aquel cursus,“las autoritats academicas d’uèi an lo dever de pilotar la construccion d’aquel programa fins a la tòca”.

 

Aquel cursus s’inaugurèt lo 7 de mai de 2015 a l’escòla Francis Garnier. L’inauguracion tenguèt la participacion de la rectritz Armande Le Pellec-Muller e del cònsol de la vila, Philippe Saurel.

 

 

 

---

Signatz la peticion sus Change.org