Espanha ven de reagir a la resolucion de l’organ de l’ÒNU que demandava dijòus passat la liberacion de tres presonièrs politics catalans. Lo govèrn de Pedro Sánchez a exigit formalament de las Nacions Unidas la descasença de dos dels cinc membres d’aquel organ: lo mexican José Guevara que n’es lo president, e lo corean Seong-Phil Hong.
 
Segon las autoritats espanhòlas, “i a un conflicte d’interèsses” entre aqueles expèrts e l’avocat britanic Ben Emmerson, que fa l’avocat internacional d’Oriol Junqueras, Jordi Cuixart e Jordi Sànchez. Dison qu’Emmerson auriá fach partida d’autres organs de l’ÒNU encargats dels dreches umans e qu’aviá trabalhat amb Guevara e Hong.

Ça que la, Espanha pòt solament respondre al verdicte mas lo pòt pas metre en question. L'estat espanhòl presentèt sas allegacions en novembre de 2018 e alavetz metèt pas en question la composicion del grop, qu'existís dempuèi 2015.  "Daissèron passar lo moment del procès per far las protèstas pertinentas, a ara las pòdon pas pus far. An fach lo morre", çò a dich Iñaki Rivera Beiras, director de l'Observatòri del Sistèma Penal e dels Dreches Umans de l'Universitat de Barcelona.

Ara, Espanha a sièis meses per respondre a la resolucion e dire se pensa de dobrir una enquèsta sus las violacions dels dreches dels presonièrs e modificar qualques leis “per las armonizar” amb sas obligacions internacionalas.
 
Lo grop de Trabalh contra las Detencions Arbitràrias, que fa partida del Comitat dels Dreches Umans de las Nacions Unidas, publiquèt dijòus passat un verdicte que reclamava l’immediata mesa en libertat d’Oriol Junqueras, Jordi Sànchez e Jordi Cuixart. En mai d’aquò, lo document demandava al govèrn espanhòl de lor pagar una indemnitat e de far una enquèsta “exaustiva e independenta” sus l’afar. En mai d’aquò, lo rapòrt assegurava que los poders judiciari e executiu espanhòls s’èran “concertats” per “decapitar” l’independentisme.
 
Lo president de la Generalitat de Catalonha en foncions, a sollicitat al govèrn espanhòl l'immediata mesa en libertat dels presonièrs politics.
 

Avui hem aprovat, d'acord amb la comunicació de l'ONU, demanar a la Fiscalia l'alliberament immediat dels presos polítics. Així mateix, he enviat aquesta carta al president Sánchez instant-lo a fer el mateix amb la Fiscalia i l'Advocacia de l'Estat, que depèn del seu govern. pic.twitter.com/l74Oz4J9fg

— Quim Torra i Pla (@QuimTorraiPla) May 31, 2019