Las fòrças de seguretat de Sodan an tuat almens 13 personas en reprimir un acamp de protèsta. I auriá de desenats de ferits dont almens uèch en estat grèu. L’ataca a causat la panica: qualques personas fugissián e d’autras ensajavan d’evacuar los nafrats. De l’autre costat de Nil, de manifestants cercavan d’alçar de barricadas per se defendre.
 
De milièrs manifestants s’èran installats dempuèi abril passat al centre de Khartom, davant la sedença de l’armada en tot demandar al govèrn militar de transicion que cediguèsse lo poder als civils.
 
L’armada sodanesa ditz qu’an pas agarrit los manifestants. Lo pòrtavotz del Govèrn Militar de Transicion a assegurat qu’avián sonque agit contra “d’elements incontrarotlats e violents que se serián amagats dins l’acamp e qu’aurián semenat lo caos”.
 
Dempuèi lo mes d’abril passat, Sodan es governat per un Conselh Militar de Transicion que tombèt lo president Omar Al Bashir, al poder dempuèi 30 ans.
 
Lo Conselh Militar accèpta la creacion d’un govèrn provisòri integrat per de civils baste que siá somés a l’autoritat militara fins a la convocacion d’eleccions.
 
Los opausants de l’Aliança per la Libertat e lo Cambiament an anonciat qu'arrestavan sas convèrsas amb los militars après aquela repression. Pasmens, aquelas convèrsas s’èran ja interrompudas de facto lo 21 de mai passat après l’impossibilitat d’arribar un acòrdi.