Es pompièrs d’Aran, ua des institucions mès aimades deth país, celebèren agèr dimars eth dia de Santa Barbara, damb era participacion des institucions araneses e representants deth govèrn de Catalonha.

Eth director generau de proteccion, extincion d’incèndis e sauvaments dera Generalitat de Catalonha, Jordi Gassió qu’acompanhèc ath Sindic d’Aran, Carlos Barrera, a presidir es actes deth dia dera patrona des Pompièrs d’Aran.
 
Era celebracion, que compdèc damb era preséncia de representats des Mossos d’Esquadra e Pompièrs e Gendarmes der Estat francés, que comencèc damb ua celebracion religiosa, seguida de diuersi actes en parc des Pompièrs de Vielha.
 
Eth Sindic qu’anoncièc que se contunhe en tot trabalhar en ua naua convencion de collaboracion damb eth govèrn dera Generalitat de Catalonha en tot auançar entà un modèl pròpi entà Aran, a on “era figura deth pompièr volontari ei fonamentau”.
 
“Era recession economica mèrque un present e un futur dera aplicacion ena Val d’Aran des matèries transferides ath Conselh Generau d’Aran. Er engatjament deth govèrn d’Aran ei hèr toti es esfòrci de besonh entà mantier era prestacion des servicis basics entara ciutadania: sanitat, benestança sociau e era responsa de qualitat as emergéncies”, ce diguèc Barrera ena sua intervencion.
 
Deth sòn costat, Gassió que parlèc tanben dera situacion economica e que valorèc eth trabalh dels Pompièrs d’Aran, qu’en aqueri moments de reduccions budgetàries e “hèn çò impossible entà mantier era seguretat e era benestança dera poblacion aranesa”.




GCA/FM