Los liceans de la Val d’Aran aguèron ièr una conferéncia informativa que los assabentava de lor drech de passar los examens preüniversitaris en occitan. Lo cap del Burèu d’Accès a l’Universitat de la Generalitat de Catalonha, Jesús M. Prujà, informèt los escolans araneses sus las espròvas que començaràn lo 12 de junh venent.
 
Los liceans araneses an drech de passar las espròvas d’accès a l’Universitat en occitan. E mai los examens se tenga fòra de la Val d’Aran, la lenga occitana es reconeguda en Aran dempuèi 1979 e en tota Catalonha dempuèi l’an 2006.
 
Ongan, enfin, los govèrns de Catalonha e d’Aran an signat un acòrdi amb l’Universitat de Lhèida per garentir que sián en aranés los enonciats e la correccion de las espròvas preüniversitàrias. Atal, l’Universitat de Lhèida prepausarà los enonciats de qualques examens en lenga nòstra e ne garentirà una correccion en condicions volgudas. D’en primièr, per las espròvas d’ongan se prepausarà en occitan aranés los enonciats de l’examen d’istòria, matèria obligatòria per totes los escolans. Pus tard s’incorporarà los enonciats dels examens de las autras matèrias.
 
Lo Conselh General d’Aran encoratja los escolans araneses: “Serie positiu qu’es alumnes d’Aran s’impliquèssen ena normalizacion dera lengua pròpia deth país, ben escuelhent er enonciat en aranés o ben responent as pròves que volguen”.
 
De mençonar l’estudianta aranesa Lourdes Bruna, qu’en 2017 respondèt pel primièr còp a dos examens preüniversitaris en aranés, après o demandar pr’amor de l’oficialitat de l’occitan en Catalonha dempuèi 2006.