Es començat lo micromecenatge per entamenar la sèria de television sus l’istòria de Joan Lamon, dich Pelòt, lo bandit legendari de Bigòrra del sègle XVIII que preniá als rics per distribuir als paures. Aquel finançament participatiu a una tòca de 10 500 èuros e cèrca d’implicar lo.mai  de personas  possible dins lo projècte. Vòlon “daissar a las gents la possibilitat de participar a aquela aventura ambiciosa, pr’amor que s’agís de lor istòria, de vòstra istòria, que siatz de Bigòrra o d’endacòm mai, car de Pelòts n’i a agut dins lo Mond entièr e a totas las epòcas”.
 
Escricha per la bigordana Èva Cassagnet e lo bearnés Julian Cabarry, la sèria es producha per l’associacion, Òc Tèle e Chicken’s Chicots. Lo pilòt serà rodat al començament de julhet e projectat a partir d’agost dins los cinèmas, festenals e eveniments culturals. Lo rodatge de la primièra sason e sa difusion sus Òc Tèle en avantprimièra son previstes per 2020. Dimècres passat, 5 de junh, se faguèt lo casting per causir los actors.
 
A travèrs d’un agach contemporanèu e d’un apròchi leugièr, los realizaires prepausan de descobrir lo quotidian dels òmes e las femnas de la Gasconha del sègle XVIII. Dins una primièra sason, la sèria comprendrà 13 episòdis de 4 minutas que rebatràn lo bandit, lo país e l’epòca. Los autors an soslinhat que foguèt un temps ben agitat, que los quaranta ans de vida de Pelòt foguèron marcats per de cambiaments de regims, de guèrras e de trebolums socials nombroses.
 
Nascut en 1776, Joan Lamon, dich Pelòt moriguèt dins la preson de Tarba quaranta ans pus tard. La transmission orala de sas accions l’an fach venir un personatge legendari.
 
Per sosténer lo rodatge s’organizarà un eveniment al castèl de Croselhas (Vic Vilh) lo 29 de junh.

 
 
 
 
 

---

Participatz al finançament collectiu de la sèria Pelòt sul sit proarti.fr.