Lo jornal politic Occitània Arroja denóncia un cas grèu de repression policièra. Un de sos militants seriá estat detengut pendent tres jorns en isolament total, obligat de dormir al sòl, acusat falsament d’aver participat al sacatge del temple franc-maçon de Tarba, un fach que Libertat aviá clarament condemnat.
 
Segon un comunicat difusat suls rets socials, lo militant del partit d’esquèrra occitanista foguèt arrestat lo dimars 4 de junh passat de matin mentre qu’èra solet a l’ostal. Lo menèron al comissariat de Pau, e puèi al de Tarba ont foguèt plaçat en gàrdia a vista e isolament total, sens quitament poder apelar un avocat o la familha.
 
Après dormir tres jorns per sòl e après manjar escassament, foguèt jutjat per l’atac del temple franc-maçon de Tarba, que s’èra tengut en març passat. Lo procès se faguèt sens la preséncia de cap avocat causit per l’acusat. L’an condemnat a 140 oras de trabalhs d’interès general e li es enebit de participar a cap de manifestacion pendent sièis meses.