Las sopas seràn repartidas en cinc categorias: la Sopa d’aicí (ingredients de mens de 150 Km); la Sopa d’endacòm mai (amb los ingredients de vòstra causida); la Sopa dels joves (mens de 18 ans, dobèrta tanben a las escòlas); la Sopa del Lauragués de 2030: anticipatz amb los ingredients del cambiamment climatic!; la Sopa electorala: ingredients atipics e mesclas espantantas.

 

Lo programa de la vesprada serà aqueste: 16h45: Acuèlh dels participants, dels curioses e dels lipets, rescalfatge (eventual) de las sopas e constitucion de la jurada; 17h: Tastas per le jurada; 18h: Deliberacions del temps que cadun e caduna tasta las sopas; 19h: Remesa en musica, amb la Bodega de la Montanha Negra, dels prèmis lipets ofèrts pels productors locals.

 

Per participar, se cal marcar alprèp d’Occitania – Palanqueta al +33 (0)6-68-49-37-29 o al +33 (0)6-17-98-54-40, o ben per corrèu electronic.

 

Per validar l’inscripcion, devètz obligatòriament balhar un nom a vòstra sopa e la recèpta escrita. Presentaretz la vòstra sopa dins una ola d’al mens 3 litres. La jurada se composarà d’un desenat de personas, adultes e mainatges causits dins l’amassada. La grasilha comprendrà 4 critèris notats de 1 a 5 punts que permetràn de determinar las 5 sopas las mai presadas. Los critèris d’evaluacion retenguts seràn los seguents -en se disent plan qu’evaluar un plat es un acte forçadament subjectiu. Fòra la sabor o lo saupre-faire del cosinièr, lo demai ven del plaser dels uèlhs e del cèl de la boca-:

 

1. La sabor, lo gost: Perfum, flaira e sabor. Vòstra sopa es de segur la melhora, que la recèpta siague pas originala, o, al contrari plan originala.

 

2. La consisténcia: Vòstra sopa se presenta amb de talhons, en chapladís, passada o mesclada.

 

3. L’originalitat de la recèpta: Vòstra sopa es del país o del cap del monde? Tornatz faire la recèpta de la mameta o imitatz un grand cap-cosinièr?

 

4. Per la Sopa dels joves, cal portar la pròva que los dròlles an participat.

 

5. Per la Sopa d’aicí: Vos caldrà balhar l’endreit ont an butat los legums e l’endreit ont es venguda la bèstia.

 

Per çò qu’es del nivèl, de las competéncias e de las coneissenças requesits, pas complicat: sufís de voler preparar una sopa e de jogar lo jòc.


Alan Roch