Lo govèrn regional d'Andalosia, fruch d’un pache del Partit Popular, de Ciutadans e de Vox, a decidit d’establir un budget de 100 000 èuros per ajudar als andaloses que vivon en Catalonha o al País Valencian e que serián “de victimas de l’immersion lingüistica” en catalan. Aquel argent serà destinat per “atenuar los problèmas que los entraïnan suls descendents dels membres d’aquelas comunautats los procèsses d’immersion lingüistica, que lor poirián encoratjar a abandonar gradualament lors raices culturalas e lingüisticas”.

Aquò se traduirà per una aumentacion de las subvencions a las associacions d’andaloses dels Païses Catalans per refortir l’estudi e l’emplec de la lenga espanhòla.

L’idèa es la seguida d’una campanha catalanofòba del partit ultradrechista Vox, qu’assegura que l’immersion lingüistica en catalan met en perilh la lenga espanhòla. De fonts d’aquel partit an dich que la tòca d’aquel budget es d’assegurar que “los estudiants andaloses que vòlgan estudiar en espanhòl pertot en Espanha o pòscan far”.

Aquel acòrdi dels tres partits de drecha espanholista especifica tanben que lo budget se poirà aumentar.

Dins l’acòrdi s’especifica d’autras mesuras impausadas per l’extrèma drecha. Son convenguts d’eliminar la transversalitat de genre, que prevesiá de garentir l’egalitat; de planificar d’infrastructuras judiciàrias e un organ que coordenen las fòrças de seguretat per combatre l’immigracion dicha illegala. A mai, en suprimit la paraula “violéncia de genre” e l’an cambiada per “violéncia intrafamiliala”, an limitat las accions per restablir la memòria istorica en empachar que se trabalhe a las fòssas comunas de las victimas del franquisme e a la banca d’ADN.