Deman divendres, Barcelona metrà a l’onor las culturas occitana e arpitana amb un eveniment organizat pel Centre Artesà Tradicionàrius (CAT), especializat en musica tradicionala, e lo CAÒC. Lo grop de las Valadas, Blu l’Azard, portaràn l’orient del país nòstre a la capitala de Catalonha amb una conferéncia e un balèti poetic. La conferéncia entitolada “Occitan e arpitan, de lengas que travèrsan de frontièras” cèrca de pausar la question sus l’avenir d’aquestas doas lengas minorizadas entre los estats francés e italian. Serà dicha per la quita còla de Blu l’Azard, activistas per la lenga e per la diversitat lingüistica e culturala dels alps occitanoarpitans. Puèi, a 22h, es previst un concèrt e balèti poetic menat a tèrme pel meteis grop que se definís coma “l’encòntre de quatre musicaires provenents da d’experiéncias musicalas diferentas, mas a lhi acomunar es la provenença da de zònas de lenga e cultura occitana e francoprovençala”.

 

---

Serada occitanoarpitana amb Blu l’Azard

#Balpoetic. Recèrca, tradicion, composicion e improvisacion occitanoarpitanas

Divendres 21 de junh a partir de 20h30

Centre Artesà Tradicionàrius

Plaça d’Anna Frank - 08012 Barcelona

Mai d’informacions sus tradicionarius.cat