L’èx-primièr ministre francés, Manuel Valls, ara conselhièr municipal de la comuna de Barcelona, poiriá venir ministre dels afars exteriors de l’estat espanhòl, segon d’informacions publicadas perMoncloa. Segon aquel jornal politic espanhòl, Valls auriá entamenat de negociacions amb lo Partit Socialista espanhòl (PSÒE). De son caire, Le Figaro precisa que las “posicions pròeuropèas e antiindependentistas” de Valls “plairián als dirigents del PSÒE, mas [que] sa renomenada en Euròpa poiriá far ombra al primièr ministre, Pedro Sánchez”.
 
Valls se seriá reünit amb de caps del PSÒE dins un restaurant de Madrid, après sa rompedura amb lo partit Ciutadans, amb lo qual l’èx-primièr ministre francés s’èra presentat al Conselh Municipal de Barcelona.
 
Ciutadans rompèt sas relacions amb Valls après qu’aqueste aguèt votat en favor de l’investidura d’Ada Colau coma consolessa màger de Barcelona. Valls reagiguèt en disent que lo partit espanholista èra “irresponsable” e critiquèt lors paches amb l’ultradrecha de Vox. “Ciutadans èra abans un partit liberal”, çò diguèt Valls en precisar que “pacha ara amb una formacion reaccionària e antieuropèa”.
 
Ara, lo primièr ministre espanhòl Pedro Sánchez ten lo nom de Manuel Valls coma un possible candidat al pòst de ministre dels afars exteriors, après que Josep Borrell es estat elegit eurodeputat. Per Sánchez, aquò poiriá èsser un gèst de simpatia envèrs los liberals en Euròpa, amb los quals a ja entamenat de contactes.