Lo candidat del Partit Republican del Pòble (CHP), Ekrem İmamoğlu, es lo nòu cònsol màger d’Istambul après aver ganhat tornarmai las eleccions municipalas de la vila pus granda de Turquia.
 
En mai passat, lo Conselh Suprèm Electoral de Turquia ordenèt de far una nòva eleccion municipala dins aquela comuna en seguida d’una demanda facha pel Partit de la Justícia e del Desvolopament (AKP) del president Recep Tayyip Erdoğan. Lo candidat de l’AKP, Binali Yıldırım, aviá perdut contra l’opausant Ekrem İmamoğlu per un 0,2% dels vòtes. Ara, İmamoğlu a vencut amb mai del 54% dels vòtes del temps que Yıldırım n’a obtengut lo 45%. Aqueste còp, İmamoğlu a ganhat dins 29 districtes (Istambol n’a 39) e la partipacion es montada fins a un 84%.
 


Aqueste còp, lo perdeire a benastrugat publicament İmamoğlu. “Li desiri de succès. Aurà ma collaboracion sus quins prètzfaches qu’entreprenga al benefici de las gents d’Istambol”. De son caire, İmamoğlu a assegurat que lo mond son anats a las urnas per defendre la democracia e a afirmat que sa victòria es “un nòu començament per la vila d’Istambol”.
 
De mençonar los pròcurds del Partit Democratic del Pòble (HDP), que son estats un còp de mai fondamentals per permetre aquela victòria, puèi qu’an pas presentat cap de candidat en demandant a lors partisans que votèsson per İmamoğlu.
 
Lo president turc, Recep Tayyip Erdoğan, a tanben felicitat İmamoğlu e a dich qu’espèra qu’aquel resultat beneficiarà a la vila.

 
 
 

İstanbul Büyükşehir Belediye Başkanlığı yenileme seçimi sonuçlarının İstanbul'umuz için hayırlara vesile olmasını diliyorum. Milli irade bugün bir kez daha tecelli etmiştir. Gayrı resmi sonuçlara göre seçimi kazanan Ekrem İmamoğlu'nu tebrik ediyorum.

— Recep Tayyip Erdoğan (@RTErdogan) June 23, 2019