Los Jòcs Olimpics d’Ivèrn tornan dins l’estat italian. Après Turin e las Valada occitanas, l’an 2026 serà lo torn de Milan, concretament de l’estacion de Cortina d’Ampezzo, situada en Venèt. Una estacion que foguèt ja olimpica en 1956. La candidatura nòrd-italiana s’es impausada sus la d’Estocòlme per quaranta sèt vòtes sus trenta quatre.
 
E mai Suècia e Itàlia sián dos païses amb una longa tradicion d’espòrts d’ivèrn, lo comitat olimpic a preferit Milan car presentava un engatjament institucional pus grand. E mai, a la presentacion de la candidatura, los presidents de las esquipas de fotbòl de l’Inter de Milan e del Milan A.C. an anonciat que bastirián un nòu estadi en plaça de l’actual Giuseppe Meazza/San Siro.
 
L’eleccion es estada marcada pel fach qu'en mens d’un an cinc vilas candidatas —Calgary (Canadà), Erzurum (Turquia), Sapporo (Japon), Graz (Àustria) e Sion (Soïssa)— renoncièron successivament a aculhir los jòcs.
 
 
La candidatura aranesa
 
La candidatura de Barcelona-Pirenèus, que prevesiá qualques espròvas en Aran, foguèt gelada pel conselh municipal de Barcelona. En 2015, la consolessa màger alavetz nòva, Ada Colau, decidiguèt de cancelar la candidatura. Mentretant, lo mond partisan d’aquela candidatura an trabalhat per la tornar presentar per l’an 2030. Sabèm pas se la presentaràn, après l’anóncia de Milan, o tornaràn trobar lo refús de la comuna de Barcelona.
 
Mentretant, lo conselhièr del Comitat Olimpic Internacional (COI), Gilbert Felli, vesitèt en setembre passat la Val d’Aran per ne valorizar la candidatura. Felli vesitèt pendent tres jorns los diferents sètis e infrastructuras que ne poirián far partida.
 
Acompanhat de las autoritats aranesas e del secretari general de l’espòrt de la Generalitat de Catalonha, lo representant del COI afirmèt que la candidatura de Barcelona-Pirenèus podiá aculhir los Jòcs Olimpics d’Ivèrn e comptar sul sosten e l’acompanhament del comitat olimpic.
 
La vesita serviguèt per soslinhar la capacitat esportiva, naturala e ostalièra d’Aran.