600 km, 4 dias e 3 nueits de contunh a córrer, aquiu lo programa de La Passem 2020, qui prava beròi! L'eveniment que's tienerà deu 30 d' abriu dinc au 3 de mai de 2020, e que traucarà, en mei de Biarn, las Lanas e mei pregondament Bigòrra, dejà rasejada lo prumèr còp.

 

L'associacion Ligams, qui maneja l'eveniment, que guarda la recèpta deu succès de 2018, mes que la va adobar dab quauques ingredients mei; Au bèth mei de las idèas navèras alavetz, ua mei bona communicacion amont de l'eveniment, mei que mei suus hialats sociaus. Atau, que son suu punt d'aviar lo hashtag #oneilapassem pendent tot l'estiu: los vacancèrs qui pòrtan lo quessòt jaune de La Passem que seràn pregats de's préner en fòto e de la publicar suus hialats sociaus,entà har vàler la corruda per delà las termièras gasconas. Tanben, que van organizar un concors en linha entà causir lo lògo oficiau de l'edicion 2020. Enfin, ua comunicacion mei bona que's hè tanben en musica, Ligams ne s'ac a pas desbrombat! Lo mes passat dejà, qu'avièn un aperet entà trobar la cançon oficiau de l'eveniment. Entà participar, las constrentas que son primas: que cau que las paraulas e parlin de la corruda e que sian màgerment en gascon. Tots los musicaires que son convidats a participar.  

 

Mes entà manejar tot aquerò, totun, qu'an tanben besonh d'ahortir las esquipas. Qu'apèran donc lo monde a s'investir dens la navèra organizacion. En efèit, l'estrambòrd de la prumèra edicion que trobè un sostien popular deus bèths, e que son nombrós adara, los qui vòlen arcuélher La Passem a lor. Totun, los de Ligams qu'insisteishen suus besonhs gigantàs qui hèn hrèita entà bastir un tau eveniment. E sustot, qu'an besonh de monde de pertot! Per'mor un deus nombrós interès de l'eveniment qu'ei tanben de crear ligams per delà Biarn: atau, com ac brembè Michaël Barret, membre de Ligams, au micro de Ràdio País: “Ne son pas los bearnés de Pau qui van organizar la (traucada, NDLR) de Bigòrra. Que son los de Bigòrra qui van encuantà's deu circuit de Bigòrra”. Balhar la man sus la comunicacion, las installacions o l'organizacion locau, totas las competéncias que son las plavengudas. Los qui vòlen investí's que's pòden inscríver suu sit Internet lapassem.com.

 

L'associacion que balha rendetz-ve a tots los amorós de la lenga nosta au mes de noveme qui vien au quartièr deu Hedars de Pau entà presentar oficiaument l'eveniment, desvelar l'imne de La Passem 2020 autant com lo navèth lògo.

 

 

Córrer...Tà qué har?

 

Brembem, totun, qu’aqueth eveniment qu'estó creat entà crubar sòus e finançar projèctes navèths qui ajudan a la socializacion de la cultura e de la lenga gasconas. L'an passat, qu'amassèn 48 000 èuros, qui estón despartits entà finançar (en partida) 8 projèctes. Lo recuelh Contes Charnègues – Au fil de la Bidouze per Bidache Culture que pareishó quauques mes a, autant com lo libe-CD taus mainats Lo trin de la dança de la Companhia Crestian Josuèr. La reedicion de Palay qu'ei anonciada tà la fin d'annada, e lo rodatge de la sèria Pelòt portat per l’associacion Art’Òc qu'ei en camin.

 

Tà La Passem 2020, totun, qu'an drin modificat la règla, e los projèctes qui seràn sostienuts finançèrament que seràn coneishuts abans la corruda, e non pas après com en 2018.

 

Michaël Barret qu'èra dens Lo Gran Descluc de Ràdio País lo 27 de junh passat entà presentar La Passem 2020. Que'u podetz escotar aquiu.

 

---

Aqueste article es possible gràcias a un acòrdi de cooperacion entre Jornalet e Ràdio País.