capçalera campanha

Actualitats

Internacional

Hong Kong: an assautat lo Parlament de la vila per protestar contra China

Las protèstas contra la lei d'extradicion son de mai en mai nombrosas e energicas

Hong Kong commemorava ièr lo 22n anniversari de sobeiranetat chinesa mas amb de susmautas. Diluns passat, de manifestants assautèron lo Conselh Legislatiu en se servissent de carretons metallics e d’autres objèctes contondents. Tanlèu arribats dins l'emicicle, i placèron lo drapèl de l'Hong Kong britanic coma simbòl de protèsta contra lo govèrn chinés.
 
Après ocupar lo Parlament durant tres oras, los manifestants quitèron los luòcs en seguida de l'intrada de la polícia. Lo govèrn d’Hong Kong a denonciat “l’extrèma violéncia” dels manifestants. Lo sit es demorat fòrça damatjat.
 
La jornada aviá començat amb un acamp de sosten al govèrn pròchinés de la vila ont participavan d’elegits e d’èx-oficièrs de la polícia qu’anèron sosténer las fòrças de l’òrdre darrièrament criticadas per la dura repression de las manifestacions. La manifestacion se teniá sens cap d’incident entrò la fin, abans que rescontrèsse la manifestacion dels opausants. A aquel moment, la polícia reprimiguèt aquesta manifestacion amb duretat.
 
Puèi, los manifestants anèron fins al parlament e assautèron l’edifici. A l'exterior, dempuèi qualques setmanas, de grops de manifestants s’acampan per denonciar la proposicion d’una lei que permetriá l’extradicion devèrs la China continentala de tota persona sospechada de cometre de delictes. Nomenada Lei pels Delinquents Fugitius, aquesta poiriá intrar en vigor a la fin de julhet. La cap del govèrn autonòm, Carrie Lam, a ensajat d’adocir la proposicion de lei mas i a pas reüssit e los manifestants exigisson sa demission.
 
De soslinhar qu’en China los jutges son nomenats pel Partit Comunista e los presonièrs an pas cap de garentida de respièch de lors dreches umans.
 
 
 
 
 



 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

francesc Palma
2.

Non cresi que sia per la comedia de l'extradicion, que cresi que ja estava per resoldres. Cresi qu' es una excusa per far merder.

  • 1
  • 0
Aquo\'s Dins l\'Aire, Eh ? Paris, Le Fouquet\'s
1.

Per la mediaticalha parisenca los saquejaires son d'erois quand se trapan a Hong Kong e d'orres maufatans quand son a Paris o Tolosa. La jornalistalha francesa se mostra tan estrambordada per las susmautas hong-kongèsas que Russia Today (lo diable !) l'èra pel moviment dels gilets jaunes. Dins un cas coma dins l'autre s'agis d'un protèsta del poble contra lo poder. Aprèp tot, lo manat de tipes que botèron fuoc a la Bastille èran tanben de saquejaires e foguèron percebuts atal a l'epoca, abans que l'eveniment se trapèsse recuperat, idealizat e instrumentalizat quauquas decenias pus tard pels escriveires del roman nacional al servici del poder francès. Perque aquel dos pes doas mesuras de la jornalistalha francèsa dins lo rendut-compte de las susmautas de Hong-Kong e aquelas dels Gilets Jaunes ? Perque la crida dels Gilets Jaunes èra dirigida contra lo poder francès e que justament, la jornalistalha francèsa se trapa del costat d'aquel poder e ne fai plenament partida.

  • 5
  • 0

Escriu un comentari sus aqueste article