Lo Parlament Europèu comencèt ièr solemnament la primièra sesilha de sa novena legislatura marcada per l’abséncia dels tres eurodeputats independentistas catalans elegits e per la protèsta d’unes dètz mila catalans davant lo sèti principal de l’eurocambra a Estrasborg (Alsàcia). Uèi se tendrà l’eleccion del nòu president d’aquel parlament, elegit pel vòte dirècte dels ciutadans dels 28 estats de l’Union Europèa.
 
L’abséncia de Carles Puigdemont e Toni Comin, en exili, e d’Oriol Junqueras, en preson, marquèt la brèva sesilha que, en mai del president en foncions, Antonio Tajani, comprenguèt una sola intervencion, la del deputat irlandés del Sinn Féin Matt Carthy, que la faguèt justament per protestar d’aquela abséncia, que lèva de legitimitat a l’eurocambra. “Aquesta cambra deu luchar pels dreches umans e deu poder escotar la votz del pòble de Catalonha”, çò diguèt.
 

Potent intervenció de l’eurodiputat @mattcarthy en defensa dels drets del president @KRLS i el conseller @toni_comin, i de tots els seus votants. Gràcies @sinnfeinirelandpic.twitter.com/7aUn44V35i

— Joan Mria Piqué  (@joanmariapique) July 2, 2019

 
 
10 000 manifestants
 
Davant lo parlament environ 10 000 personas manifestavan en seguida de la crida facha per l’Assemblada Nacionala Catalana. Jos lo lèma “Empliscam Estrasborg”, los manifestants revendiquèron lo drech dels elegits catalans en preson o en exili de prene possession de lors sètis a l’èurocambra. Los manifestants èran sostenguts pels alsacians d’Unser Land.
 
E mai se Puigdemont, Junqueras e Comín sián estats elegits per las urnas, lo Conselh Electoral d’Espanha a decidit de los nomenar pas. A mai, la Cort Generala de Justícia de l’UE refusèt diluns passat, d’aplicar de mesuras de precaucion contra aquela decision del govèrn d’Espanha.
 
Puigdemont e Comín èran anats fins en Alsàcia, mas demorèron del costat alemand, a Kehl, a tres quilomètres d’Estrasborg. Al darrièr moment renoncièron de traversar la frontièra politica davant lo risc d’èsser detenguts. Sembla que l’estat espanhòl aviá mobilizat d’efectius policièrs en Alsàcia en voler profechar d’un protocòl aviat en 2002 entre los estats espanhòl e francés en relacion amb los membres d’ÈTA. Aquel protocòl auriá permés a la polícia espanhòla d’arrestar los exiliats e de los menar en Espanha sens besonh de passar per la justícia francesa.



 
D’autras protèstas
 
Dins la sesilha de l’eurocambra se tenguèron d’autras protèstas. D’un caire, los deputats britanics europeïstas èran vestits de jaune per revendicar que s’arrestèsse lo Brexit. D’autre latz, los deputats eurofòbs virèron l’esquina quand sonèt l’imne de l’UE.
 
En mai d’aquò, qualques deputats europèus protestèron contra la detencion de la capitanessa del Sea Watch, arrestada en Itàlia après aver salvat de migrants en Mediterranèa.